وتكەن جىلى قىركۇيەك ايىندا شىڭجاڭ تەليەۆيزياسى حۋيۋي كومپانياسىمەن بىرلەسە وتىرىپ، تولى اۋدانىنىڭ اكىمشىلىگىنىڭ قولداۋىمەن  جۇڭگو قازاقتارى تاريحىنداعى تۇڭعىش تەلەحيكايانىڭ ءتۇسىرىلىمىن باستاعان بولاتى.  

فيلم توبىنىڭ 3 ايلىق وپەراتورلىق جۇمىسىنان كەيىن ءتۇسىرىلىمنىڭ العاشقى جۇمىسى اياقتالدى. ءفيلمنىڭ باس رەجيسسەرلىك مىندەتىن شىڭجاڭ تەليەۆيزياسىنىڭ بەلدى تەلە جۇرگىزۋشىسى، جۇڭگو مەملەكەتتىك 1-دارەجەلى رەجيسسەر كۇرەس قابدەن ۇلى اتقارعان. 

ال باس وپەراتورلىق قىزمەتتى «نيكو فيلم مادەنيەت تاراتۋ كومپانياسىن» قۇرۋشى نىعمەت قۇسما ۇلى اتقاردى. ەستەرىڭىزگە سالا كەتسەك، نىعمەت قۇسمان ۇلى وسىدان بۇرىن انگليا مەن سەلبەسكەن «دالا سازى» كينوسى، قازاقستانمەن سەلبەسكەن «ورالۋ» تەلەحيكاياسى قاتارلى كوپتەگەن كينو-فيلمدەردىڭ تۇسىرىلمىنە اتسالىسقان، وتكەن جىلى عانا ۇيعىر ۇلتىنىڭ «ءبىزدىڭ ماھاللە» اتتى 20 سەريالى تەلە ءفيلىمىڭ باس وپەراتورى بولسا،، «ءىلتجا» فيلمىندەگى باس وپەراتورلىق قىزمەتى ءۇشىن «كوپىر» ميكروفيلم فەستيۆالىنىڭ «ەڭ ۇزدىك وپەراتور» سىيلىعىنىڭ كانديداتى بولىپ سىيلانعان. 

ال، شىڭجاڭ تەليەۆيزياسىنىڭ مىقتى سۋرەتشىسى نۇرباقىت جاقاي ۇلى وسى رەتكى ءفيلمنىڭ باس كوركەمدىك جەتەكشىسى بولدى. نۇرباقىت جاقاي ۇلى دا «ناراتقا ماحاببات» قاتارلى كينوفيلمدەردىڭ سۋرەتشىلىك جۇمىستارىن اتقارعان ەدى. 

تەلەفيلمنىڭ باس رەجيسسەرى كۇرەس قابدەن ۇلى: «بۇل فيلم شىڭجاڭ قازاقتارىنىڭ تۇڭعىش سەريالى، ارينە ءبارىمىزدىڭ موينىمىزدا جاۋاپكەرشىلىك بار، ءتۇسىرىلىم باستاعان ۋاقىتىمىز كۇزگى مەزگىل. ال فيلمدە جاز، قىس، كوكتەم مەزگىلى قامتىلادى، ۋاقىت تىعىز، ال اكتەرلەرىمىزدىڭ ءبارى جاڭا بەت-بەينەدە، كوبى ءبىرىنشى رەت وبراز سومداۋدا. سوندىقتان قيىندىقتار از ەمەس»، - دەيدى. 

تەلەفيلمنىڭ باس وپەراتورى نىعمەت قۇسمان ۇلى: «بۇل تەلەفيلمدە ەرەكشە اتاپ وتەر ءجاي ءفيلمنىڭ رەجيسسەرى، وپەراتورى، كوركەمدىك جەتەكشىسى، شىراقشى، دىبىس رەجيسسەرلەرى، مايدان تىزىمدەۋشى، كيمشىلەرىنىڭ ءبارى قازاق ۇلتىنان، ياعني تۇڭعىش قازاق فيلم توبى قۇرىلدى دەۋگە بولادى، ءارى اكتەرلەردە قازاق تىلىندە سويلەيدى، بۇنداي ءتۇسىرىلىم توبى قازاق كينوسىندا بۇرىن-سوڭدى بولماعان ءجاي»، - دەيدى. 

فيلم الدىڭعى ءتۇسىرىلىم بارىسى اياقتاپ، ءقازىر ەرسىن ماقسات ۇلى سوڭعى مونتاج جۇمىسىنا كىرىسۋدە.

ەستەرىڭىزگە سالا كەتسەك، ­ اتتى 30 سەريالى تەلەفيلم جۇڭگو قازاقتارىنىڭ تۇڭعىش كوپ سەريالى تەلەحيكاياسى بولعالى وتىر. فيلمدە جاڭا عاسىرداعى قازاق تۇرمىسى جانە مال شارۋاشىلىعىن نەگىز ەتەتىن قازاق مالشى قاۋىمنىڭ تىرشىلىگى كورسەتىلەدى. تەلەفيلم سيۋجەتى قىستاقتاعى ۇلان، مايىرا، ەربولات، باقاي قاتارلى جاستاردىڭ توڭىرەگىندە داميدى. بۇل تەلەفيلم شىڭجاڭ تەليەۆيزياسىنىڭ از ۇلىت تىلىندەگى كينوفيلم مادەنيەت تۋىندىلارىن دامىتۋ جاعىنداعى جاڭا قادامى، ىزدەنىسى ءارى شىڭجاڭداعى قازاق تەلە تۋىندىلاردىڭ بوستىعىن تولتىرادى. فيلم وسى جىلدىڭ ءساۋىر ايىندا كورەرمەندەرمەن جۇزدەسەدى دەپ مەجەلەنۋدە.