بۇگىن تاڭعى ۋاقىتتا پوليسەيلەرگە قارسىلىق كورسەتكەن BMW جۇرگىزۋشىسىنىڭ قانىنان ەسىرتكى زاتى تابىلعان، - دەپ حابارلايدى Tengrinews.kz
الماتى قالالىق ءىىد باسپا ءسوز قىزمەتىندەگىلەردىڭ ايتۋىنشا، ەر ادامنىڭ قانىنان مورفين ەسىرتكى زاتىنىڭ ىزدەرى انىقتالعان.
"ساراپتامادان قاننان ءمورفيننىڭ بار ەكەنىن انىقتادىق. جۇرگىزۋشى "جۇرگىزۋشىنىڭ كولىك قۇرالىن الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدە باسقارۋى، سول سياقتى كولىك قۇرالىن الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدەگى ادامنىڭ باسقارۋىنا بەرۋ" بابى بويىنشا جاۋاپكەرشىلىككە تارتىلادى. ءىس سوتقا جولدانادى"، - دەدى ءىىد وكىلدەرى.
سونىمەن قاتار، وقيعا كەزىندە ينسپەكتورلاردىڭ ءبىرىنىڭ اياعى جاراقاتتانعانى بەلگىلى بولدى. جۇرگىزۋشى پوليسيا ينسپەكتورىن قاعۋ بويىنشا دا ايىپتى دەپ تانىلۋى مۇمكىن.
ەسكە سالايىق، وسىعان دەيىن الماتى قالالىق ءىىد وكىلدەرى جۇرگىزۋشىنى پوليسەيلەردىڭ جولاق ەرەجەسىن بۇزعانى ءۇشىن توقتاتپاق بولعانىن حابارلاعان ەدى.
"تولە بي-ياسساۋي قيىلىسىندا تاڭعى ساعات 8.20 شاماسىندا جول-پاترۋلدىك پوليسياسى ەكيپاجى جول قوزعالىسى ەرەجەسىن بۇزعان BMW جۇرگىزۋشىسىن بايقاعان. توقتاۋ تۋرالى بۇيرىق بەرىلدى، ءبىراق جۇرگىزۋشى تالاپقا مويىنسىنباي، جىلدامدىقتى ارتتىردى. سوندىقتان پوليسەيلەر ونىڭ ارتىنان قۋدى. ناتيجەسىندە ول ياسساۋي-شالياپين قيىلىسىندا ۇستالدى"، - دەپ حابارلاعان ەدى قالالىق ءىىد وكىلدەرى.
