رەسەي پرەزيدەنتى ۆلاديمير پۋتين قازاقستان پرەزيدەنتى نۇرسۇلتان نازاربايەۆقا سيرياداعى جاعدايدى رەتتەۋگە قاتىستى كەلىسسوزدەردى ۇيىمداستىرعانى ءۇشىن العىس ايتتى. بۇل تۋرالى ول الماتىدا پرەزيدەنت رەزيدەنسياسىندا ءوتىپ جاتقان كەزدەسۋ بارىسىندا ايتتى، - دەپ حابارلايدى Tengrinews.kz.

"مەن ءبىزدىڭ كەزدەسۋىمىزدى استاناداعى سيرياعا قاتىستى كەلىسسوزدەردى ۇيىمداستىرعانىڭىز ءۇشىن العىس ايتۋمەن باستاعىم كەلەدى. مەن قازاقستاندىق تاراپتىڭ وسى كەلىسسوزدەرگە جاقسى اسەر ەتكەنىن بىلەمىن. ءسىزدىڭ جەكە ءوزىڭىزدىڭ وسى ءىس-شاراعا قاتىسىپ، دەلەگاسيا قاتىسۋشىلارىمەن جۇمىس ىستەگەنىڭىزدى دە بىلەمىن. وسى ىسكە قاتىسۋىڭىزدىڭ ارقاسىندا كەزدەسۋلەر ءساتتى ءوتتى. كەلىسسوزدەر وسىعان دەيىن ءساتتى اياقتالعان ەمەس. سيرياداعى سوعىستى توقتاتۋدى باقىلاۋعا قاتىستى مەحانيزم قۇرىلدى. بۇل دەگەنىمىز ءبىز ءۇشىن ەڭ باستىسى، ياعني، بۇل جەنيەۆادا كەلىسسوزدەردى جالعاستىرۋعا مۇمكىندىك بەردى دەگەن ءسوز"، - دەدى ۆلاديمير پۋتين.
 

قازاقستان جانە رەسەي پرەزيدەنتتەرى نۇرسۇلتان نازاربايەۆ پەن ۆلاديمير ءپۋتيننىڭ كەزدەسۋى الماتىدا پرەزيدەنتتىڭ رەزيدەنسياسىندا ءوتىپ جاتىر. كەلىسسوزدەر بارىسىندا ەكىجاقتى ىنتىماقتاستىق ماسەلەلەرى، سونداي-اق، وڭىردەگى جانە حالىقارالىق كۇن تارتىبىندەگى ماسەلەلەر تالقىلانىپ جاتىر. كرەمل سايتىنىڭ مالىمەتىنشە، نۇرسۇلتان نازاربايەۆ پەن ۆلاديمير ءپۋتيننىڭ كەزدەسۋى بارىسىندا ەكى ەل اراسىنداعى ساۋدا-ەكنوميكالىق جانە مادەني-گۋمانيتارلىق سالالارداعى، ەنەرگەتيكا جانە عارىش، سونىمەن قاتار، حالىقارالىق كۇن تارتىبىندەگى نەگىزگى تاقىرىپتار تالقىلانادى. ەكى ەل كوشباسشىلارى ەۋرازيالىق بىرلەستىكتىڭ ءارى قاراي دامۋىنا بايلانىستى ماسەلەلەردى قوزعايدى.
 

ەسكە سالا كەتەيىك، كەشە، 26 اقپاندا نۇرسۇلتان نازاربايەۆ پەن ۆلاديمير پۋتين الماتىدا بەيرەسمي كەزدەسۋ وتكىزگەن بولاتىن. مەملەكەتتەر باسشىلارى جەكسەنبىنى الماتى ماڭىنداعى تاۋ-شاڭعى ساياجايىندا وتكىزگەن ەدى.