الماتى وبلىسى اكىمىنىڭ ورىنباسارى جاقسىلىق ومار تالدىقورعاندىق بەلسەندىلەردىڭ جوباسى «اسار» اۆتو-ەركىتىلەر قوزعالىسىنا ءۇن قوستى دەپ حابارلايدى Qamshy.kz.
اۆتو-ەركىتىلەر قوزعالىسى ەلدوس بايالىشبايەۆتىڭ باستاماسىمەن اقپان ايىنىڭ باسىندا قۇرىلعان. جوبانىڭ ماقساتى مۇمكىندىگى شەكتەۋلى جانداردىڭ ءجۇرىس-تۇرىسىن جەڭىلدەتىپ، قاجەتتى جەرىنە جەتكىزۋدى كوزدەيدى. بۇگىندە جيىرماعا جۋىق ەرىكتىلەردىڭ باسىن قوسقان باستاماعا جاقسىلىق وماردا ءوز ۇلەسىن قوسىپ، العاشقى جولاۋشىسىن سۇراعان جەرىنە جەتكىزىپ بەردى.
شىنىمدى ايتسام، مەنىڭ سۇرانىسىما وبلىس اكىمىنىڭ ورىنباسارى كەلەدى دەپ، ون ۇيىقتاسام دا، تۇسىمە كىرمەيتىن. ديسپەچەرگە قوڭىراۋ شالىپ، ءوتىنىمدى قالدىرعاننان كەيىن اراعا جارتى ساعات سالىپ، كولىك ەسىك الدىنا كەلگەندىگى جايلى حابار كەلدى. ايانداپ شىققانىمدا وبلىس اكىمى تابالدىرىقتان توسىپ الدى، - دەيدى ءى توپتاعى مۇگەدەك ميراس ءمۇرسالى. – جول بويى قالداعى الەۋمەتتىك نىسانداردىڭ مۇمكىندىگى شەكتەۋلى جاندارعا قول جەتىمدىلىگى جايلى ءسوز ءوربىتىپ جول قىسقارتتىق، - دەگەن جولاۋشى جوبا اۆتورلارىنا ءوز العىسىن جەتكىزدى.
ءوز كەزەگىندە وبلىس اكىمىنىڭ ورىنباسارى جاقسىلىق ومار وسى ارقىلى شاھار بەلسەندىلەرىنىڭ باستاماسىنا ءۇن قوسۋشىلار قاتارىن كوبەيتۋدى كوزدەيتىندىگىن ايتتى.
«مۇمكىندىگى شەكتەۋلى ازاماتتارعا كۇندەلىكتى كولىك قىزمەتىن ۇسىنۋ ءۇشىن ۋاقىت تاپشى. دەگەنىمەن، ايىنا ءبىر رەت ارنايى ۋاقىت ءبولۋدى كوزدەيمىن. يگى ىسكە قالامىزدىڭ وزگە دە ازاماتتارى ءۇن قوسىپ، مۇگەدەكتەرگە قول ۇشىن سوزادى دەپ سەنەمىن»، - دەگەن جاقسىلىق ومار جولاۋشىسىن قالاعان جەرىنە جەتكىزىپ سالدى.
«اسار» اۆتو-ەركىتىلەر قوزعالىسى بۇگىندە جيىرماعا جۋىق جۇرگىزۋشىلەردىڭ باسىن بىرىكتىردى. بۇگىنگى تاڭدا تاعى ونشاقتى ەرىكتىلەردىڭ سۇرانىسى قاراستىرىلۋدا. جوبا اۆتورلارىنىڭ سوزىنشە، مۇمكىندىگى شەكتەۋلى جاندارعا قىزمەت اتقاراتىن كولىككە بەلگىلى تالاپ قويىلادى. باستىسى، تەمىر تۇلپاردىڭ سىيىمدىلىعى، جۇرگىزۋشىنىڭ ءوتىلى ءجىتى نازارعا الىنادى.
