سارىارقا اۋدانىندا 26 اقپاندا تۇنگى ساعات ۇشتەر شاماسىندا وقىس وقيعا بولدى دەپ حابارلايدى patrul.kz. پوليسياعا 20 ادام توبەلەسىپ جاتىر دەگەن اقپارات تۇسكەن. اتالعان مەكەن-جايعا بىرنەشە پوليسەيلەر بارعان. الايدا ولار جەتكەنشە توبەلەسىپ جاتقان ادامدار تاراسىپ كەتكەن.  

بىرنەشە ۋاقىت وتكەننەن كەيىن راسيادان سول اۋداندا ءبىر توپ جىگىت تۇندە تۇرعىنداردىڭ تىنشتىعىن بۇزعانى حابارلانعان. پوليسەيلەر مەن جۋرناليستەر كەلگەندە 6-8 ادامنان تۇراتىن توپتى كورگەن. وزدەرىن دورەكى ۇستاعان جىگىتتەر سىرت كوزگە ىشىمدىك ءىشىپ العان ادامعا ۇقسايدى. الايدا ماسەلە الكوگولدە ەمەس بولىپ شىقتى. تۇرعىنداردىڭ تىنىشتىعىن بۇزعان جىگىتتەر قالاداعى سىيلى ادامداردىڭ بالالارى ەكەن.

«سەن جىگىت ەمەسسىڭ بە؟ ءجۇر، سويلەسەيىك» دەپ ايقايلادى بىرەۋى. وعان جۋرناليستەردىڭ كامەراسى جاقپادى.

«مەن ءوز قۇقىعىمدى بىلەمىن. سەندەر ءبىزدى تۇسىرۋگە قۇقىلارىڭ جوق» دەدى.

«وندا ارىز جازىڭىزدار» دەپ جاۋاپ بەردى پوليسەيلەردىڭ ءبىرى.

«ءيا، ءقازىر-اق جازامىن. ودان كەيىن سەندەردىڭ بارلىعىڭ تۇرمەگە وتىراسىڭدار» دەپ جاۋاپ بەردى.

«وندا ءجۇرىڭىز».

«قالاسام بارامىن، قالاماسام بارمايمىن» دەدى جىگىت.

جاستار وزدەرىن دورەكى جانە وزدەرىنە وتە سەنىمدى ۇستادى. پوليسەيمەن ەرەگىسكە تۇسكەن جىگىت قۇجاتتارىن كورسەتۋدەن باس تارتتى. ءىس ناسىرعا شابارىنان قورىقسا كەرەك ءبىر توپ جىگىت Mitsubishi Outlander كولىگىنە وتىرىپ، قاشا جونەلدى. سوڭىندا پوليسەيلەر ولاردى ۇستاپ، سارىارقا اۋداندىق ىشكى ىستەر باسقارماسىنا جەتكىزدى. وندا ينسپەكتورلار  ق ر اكىمشىلىك قۇقىقبۇزۋشىلىق كودەكسىنىڭ 1 ءبولىم 437ء-شى  بابى بويىنشا حاتتاما تولتىردى.

الايدا تاجىريبە كورسەتكەندەي شەنەۋنىكتەردىڭ بالالارىن ايىپپۇلمەن قورقىتا المايسىڭ. شەنەۋنىكتەردىڭ بالالارى زاڭعا نەمقۇرايلى قاراپا قانا قويماي، ونىڭ وكىلدەرىنە دە باعىنبايدى.