كوررۋپسياعا قارسى ءىس-قيمىل ۇلتتىق بيۋروسى بتا بانكتان جىمقىرىلعان قارجى ءىسى تۋرالى سوتقا دەيىنگى تەرگەۋدى اياقتاعانىن مالىمدەدى. بۇل ىستە باستى فيگۋرانت اتالعان بانكتىڭ بۇرىنعى باسشىسى، وپپوزيسيالىق ساياساتكەر مۇحتار ءابليازوۆ. ول وتكەن جىلى جەلتوقسان ايىندا ەۋروپالىق وداق كوميتەتى ونى رەسەيگە ەكستراديسيالاۋدان باس تارتقان سوڭ، فرانسۋز تۇرمەسىنەن بوستاندىققا شىققان. بۇل تۋرالى centralasian.org جازدى.
كوررۋپسياعا قارسى قىزمەتتىڭ مالىمەتى بويىنشا، ءابليازوۆ بتا بانكتەن قارجى جىمقىرۋ ءۇشىن ءوزى باسقاراتىن قىلمىستىق توپ قۇرعان، قىزمەتىن اسىرا پايدالانىپ، اقشانىڭ ءىزىن جاسىرعان. بۇل ىسكە قاتىستى وزگە فيگۋرانتتاردىڭ ىشىندە قاڭتار ايىندا تۇركيادان قازاقستانعا ەكستراديسيالانعان بانكتىڭ باسقارما باسشىسىنىڭ ءتوراعا ورىنباسارى بولعان جاقسىلىق جارىمبەتوۆ، بانكتىڭ باسقارما باسشىسى بولعان ءسادۋاقاس مامەش پەن بانكتىڭ نەسيە بەرۋ بويىنشا ديرەكتورى بولعان قايرات سادىقوۆتىڭ اتى-جوندەرى اتالادى.
«كەلتىرىلگەن زياننىڭ جالپى سوماسى 7،5 ميلليارد اقش دوللارىنان اسادى. تەرگەۋ ىسىندە ۇرلانعان قارجى حالىقتىڭ زەينەتاقى قورىنا سالعان سالىمى، قازاقستان ازاماتتارىنىڭ جەكە جيناعى جانە شەتەلدىك قارجى ينستيتۋتتارىنان الىنعان قارىزى بولاتىن»،- دەلىنگەن كوررۋپسياعا قارسى قىزمەتتىڭ حابارلاماسىندا. سونىمەن بىرگە قىلمىستىق ءىس 2224 تومنان تۇراتىنى ايتىلادى.
ۇلتتىق بيۋرو ءابليازوۆتى ەكى رەت — 2 اقپاندا جانە 14 اقپاندا استاناعا تەرگەۋگە شاقىرعان.
شەتەلدە تۇراتىن ءابليازوۆ وزىنە قارسى قوزعالعان قىلمىستىق ىستەردىڭ ءبارىن تەرىسكە شىعارىپ، ساياسي استارى بار دەپ بىرنەشە رەت مالىمدەگەن.
پىكىر قالدىرۋ