قوستاناي وبلىسىنداعى امانگەلدى اۋداندىق سوتىنىڭ زالىندا جاسالعان قارۋلى شابۋىلدىڭ ءمان-جايى بەلگىلى بولدى، - دەپ حابارلايدى Tengrinews.kz پورتالى قوستاناي وبلىستىق سوتىنىڭ باسپا ءسوز قىزمەتىنە سىلتەمە جاساپ.

"بيىل 28 اقپانىندا ساعات 10.00 شاماسىندا سوت وتىرىسى باستالعانعا دەيىن ازامات ن.ج.بەكيبايەۆ ازاماتشا ج.ا.تاۋبايەۆامەن سوزگە كەلىپ، كۇتپەگەن جەردەن اياق كيمىنىڭ ىشىنەن پىشاق الىپ، وعان بىرنەشە رەت سۇعىپ العان. قاقتىعىس كەزىندە سۋديا مەن سوت قىزمەتكەرلەرى سوت زالىندا بولماعان. ازامات ن.ج.بەكيبايەۆ ءوزىن توقتاتپاق بولعان سوت پريستاۆىنا بەلسەندى قارسىلىق كورسەتكەن"، - دەلىنگەن سوتتىڭ حابارلاماسىندا.

وسىدان كەيىن، سوتتاعىلاردىڭ ايتۋىنشا، ونى وقيعا ورنىنا شۇعىل كەلگەن سوت ءتوراعاسى مەن "مامانداندىرىلعان كۇزەت قىزمەتى باسقارماسى" مم قىزمەتكەرلەرى توقتاتقان. جەدەل جاردەم شاقىرىلىپ، جارالانعان ايەل اۋرۋحاناعا جەتكىزىلگەن. ءبىراق العان جاراقاتىنان ول قازا تاپقان. سونىمەن قاتار، وقيعا ورنىنا امانگەلدى اۋداندىق ءىىب شۇعىل تەرگەۋ ءبولىمى شاقىرىلىپ، ەر ادام سولارعا تاپسىرىلعان.

"وقيعا امانگەلدى اۋداندىق سوتىنىڭ عيماراتىندا ج.ا.تاۋبايەۆانىڭ ن.ج.بەكيبايەۆپەن نەكە بۇزۋ تۋرالى شاعىمى بويىنشا سوت وتىرىسى باستالعانعا دەيىن سوت زالىندا ورىن العان. ءىس بويىنشا ءتوراعالىق ەتۋشى سۋديا - ن.ت.مالەلوۆا"، - دەلىنگەن سوتتىڭ حابارلاماسىندا.

سونىمەن قاتار، سوتتاعىلاردىڭ ايتۋىنشا، ءوز ايەلىن پىشاقتاعان ەر ادام ارقالىق مەملەكەتتىك ينستيتۋتىن "دەنە شىنىقتىرۋ جانە سپورت" ماماندىعى بويىنشا بىتىرگەن، امانگەلدى ورتا مەكتەبىندە ءمۇعالىم، دزيۋدومەن اينالىسادى ەكەن.

سوت عيماراتىنا پىشاق الىپ ءوتۋ دەرەگى بويىنشا، اۋداندىق سوتتا كەزەكشىلىك ەتكەن "مامانداندىرىلعان كۇزەت قىزمەتى باسقارماسى" مم قىزمەتكەرلەرىنە قاتىستى قىزمەتتىك تەكسەرىس باستالدى. بۇل دەرەك امانگەلدى اۋداندىق ىشكى ىستەر بولىمىندە تىركەلگەن.