ق ر پرەزيدەنتى نۇرسۇلتان نازاربايەۆتىڭ جيەنى ايسۇلتان نازاربايەۆ  Facebook پاراقشاسىندا ءوزىنىڭ جاڭا قىزمەتى تۋرالى ايتىپ بەردى دەپ حابارلايدى qamshy.kz.

ول بۇعان دەيىن قازاقستاننىڭ فۋتبول فەدەراسياسىنا قاتىستى ءوزىنىڭ سىني پىكىرلەرىمەن كوزگە ءتۇسىپ جۇرگەن ەدى. ايسۇلتان نازاربايەۆ قازىردە ول سوزدەرىنەن اينىمايتىنىن جەتكىزدى.

«باسشىلىققا كەلگەن جاڭا ادامدار  بىرگە وتاندىق فۋتبولدى قايتا قۇرۋدى ۇسىنعاندا، ولاردىڭ بەتىن قايتارا المادىم. مەن جاڭا باسشىلىقپەن كەزدەسىپ، ءبىز اشىق سويلەستىك. قازىرگى جاعدايعا وبەكتيۆتى تۇردە باعا بەرە الاتىن، قوردالانعان ماسەلەلەردى كوتەرىپ، ونىڭ سالدارىن تەرەڭىنەن تۇسىنەتىن ادامدارمەن سويلەسكەندە ماسەلەلەردىڭ شەشىم وزدىگىنەن كەلدى» دەپ جازدى ايسۇلتان نازاربايەۆ.

فۋتبول فەدەراسياسىنىڭ جاڭا ۆيسە-پرەزيدەنتى فۋتبولدى دامىتۋ ءۇشىن قانداي ىستەردى اتقاراتىنىن دا ايتىپ ءوتتى.

«ءقازىر ءبىز فۋتبولدى كوتەرۋىمىز كەرەك. ول ءۇشىن كەلىسىم مەن كوپ كۇش كەرەك. ءبىز بىرىگۋىمىز قاجەت. مەنىڭ شەشىمىمدە ەشقانداي مانساپقۇمارلىق جوق. مەن قفف باسقارمايمىن، ستراتەگيانى انىقتامايمىن، فەدەراسيانىڭ كوپ جۇمىسىنىڭ باعىتىنا اسەر ەتە المايمىن. فۋتبولدىڭ ءوزى الاڭعا شىققاندا ءبىزدى توپپەن جۇمىس ىستەۋگە ۇيرەتەدى. مۇندا جەكە كەلىسپەۋشىلىكتەرگە، ەموسياعا ورىن جوق. ورتاق ماقسات بولعاندا توپپەن جۇمىس ىستەيمىز. سوندىقتان ءقازىر مەن بولەك ءبىر ايماقتى الىپ، ورتاق مۇددە ءۇشىن رەتكە كەلتىرۋگە دايىن قاراپايىم قىزمەتكەرمىن. ۇلتتىق فەدەراسيالارمەن جاقسى بايلانىس ورناتۋ كەرەك».

ايسۇلتان نازاربايەۆ اكەسىنىڭ قايتىس بولعانىنا ءبىر جىل تولعاندا ونىڭ جاڭا قىزمەتكە كىرىسەتىنىن  ادامدار بەلگى دەپ سانايتىندارىن دا جازدى.

«نەلىكتەن ءبىز بارلىعىنان ءبىر بەلگى كورەمىز؟ ارينە مەن ءۇشىن بۇل اكەمنىڭ قۇرمەتپەن ەسكە الۋعا تاعى ءبىر سەبەپ. ارينە سول كەزدە اتقارلعان جۇمىستاردى قازاقستاندىقتار جوققا شىعارا المايتىن شىعار. ءبىز ەۋروپا جانە ازيانىڭ كەيبىر ەلدەرىنىڭ  فۋتبول باسقارماسىندامىز. فۋتبول ءۇشىن اكەمنەن ارتىق ءىس اتقارا الامىن با، جوق پا بىلمەيمىن. ءبىراق مەن تىرىسامىن» دەيدى ول.