ناۋرىزدىڭ 21ء-ى كۇنى الماتى-2 تەمىر جول ۆوكزالىنان الماتى مەن تاشكەنتتىڭ اراسىندا جولاۋشى تاسيتىن «تۇلپار-تالگو» جۇردەك پويىزى العاشقى ساپارىنا شىقتى دەپ حابارلايدى «قازاقستان تەمىر جولى» ۇلتتىق كومپانياسى باسپا ءسوز قىزمەتى.

«قازاقستان تەمىر جولى» كومپانياسى ۆيسە-پرەزيدەنتى ەرىك يماشيەۆتىڭ سوزىنشە، كورشىلەس ەكى ەل اراسىنداعى جاڭا پويىز قاتىناسى قازاقستان مەن وزبەكستان ۇكىمەتتەرى اراسىندا جاسالعان كەلىسىمى نەگىزىندە جۇزەگە اسىرىلىپ وتىر.

«قازاقستاندىق جانە وزبەكستاندىق تەمىرجولشىلار حالىقارالىق پويىزدى بەلگىلەنگەن كەستەگە ساي جۇرگىزۋگە بارىن سالدى. بۇل ءبىزدىڭ حالىقارالىق باعدارداعى بىرلەسكەن جوبامىز بولىپ تابىلادى» دەگەن يماشيەۆ.

29 ۆاگوننان تۇراتىن جۇردەك پويىز الماتىدان دۇيسەنبى جانە سەنبى كۇندەرى، تاشكەنتتەن سەيسەنبى مەن جەكسەنبى كۇندەرى جولعا شىعادى، ەكى ارالىقتى 16 ساعات 30 مينۋت جۇرەدى. پويىز جول-جونەكەي وتار، شۋ، تاراز، شىمكەنت، سارىاعاشقا ايالدايدى.

پويىزدىڭ باعاسى الماتىدان-تاشكەنتكە دەيىن: ليۋكس - 13 036 تەڭگە، بيزنەس - 11 077 تەڭگە، كۋپە - 9 342 تەڭگە جانە وتىراتىن ورىندارى - 4 228 تەڭگە تۇرادى.

قازىرگى كەزدە قازاقستاندىق وندىرىستەن شىققان جاڭا دا جايلى ۆاگوندارمەن جابدىقتالعان 14 جۇردەك پويىز باعدارلارى رەسپۋبليكانىڭ بارلىق وبلىس ورتالىقتارىن جالعايدى.

جۇردەك پويىز قوزعالىسىن دامىتۋ «قازاقستان تەمىر جولى» ۇك» اق باسىم باعىتىنىڭ بىرىنەن سانالادى.