اتىراۋ وبلىسىنىڭ اكىمى نۇرلان نوعايەۆ اتىراۋلىق سابيلەردىڭ تۇساۋىن كەستى. تۇساۋ كەسۋ ءراسىمى وبلىس ورتالىعىندا وتكەن ناۋرىز مەرەكەسىن تويلاۋ كەزىندە ءوتتى.
سابيلەردىڭ ءبىرىنىڭ تۇساۋىن الا جىپپەن، ەندى بىرىنىكىن توق ىشەكپەن كەسكەن ايماق باسشىسى بۇل ىرىمدارداردىڭ ماعىناسىن ءتۇسىندىرىپ بەردى:
“الا جىپپەن كەسكەنىمىز – ەشكىمنىڭ الا ءجىبىن اتتاماسىن، ەلىنە ادال قىزمەت قىلسىن دەگەن نيەتىمىز، ال توق ىشەكپەن كەسكەنىمىز – ەلى، حالقى توق بولسىن، وتانىنان ىرىس كەتپەسىن دەگەنىمىز”، – دەدى نۇرلان نوعايەۆ.
ايماق باسشىسى تۇرعىنداردى جاڭا جىل مەرەكەسىمەن قۇتتىقتاپ، ەلگە باق-بەرەكە، ىرىس پەن ىنتىماق تىلەدى، ەكونوميكالىق-الەۋمەتتىك ورلەۋدىڭ جالعاسا ءتۇسۋى ءۇشىن اتىراۋلىقتاردى ءبىر بولىپ ەڭبەك ەتۋگە شاقىردى.
ورتالىق الاڭدا وتكەن تەاترلاندىرىلعان كونسەرتتە ساحنا تورىنەن الاش ارىستارى ءاليحان بوكەيحانوۆ، احمەت بايتۇرسىنوۆ، ءمىرجاقىپ دۋلاتوۆ، حالەل دوسمۇحامەدوۆتەر، قازتۋعان جىراۋ، يساتاي مەن ماحامبەت باتىرلار، قازاق حاندىعىنىڭ نەگىزىن قالاعان كەرەي مەن جانىبەك حاندار، ەل ءۇشىن قىزمەت ەتكەن باسقا تاريحي تۇلعالار تۇرعىنداردى جاڭا جىلمەن قۇتتىقتادى.
