بۇگىن وڭىرلىك كوممۋنيكاسيالار قىزمەتى الاڭىندا جامبىل وبلىسى اكىمدىگى مادەنيەت، مۇراعاتتار جانە قۇجاتتاما باسقارماسىنىڭ باسشىسى دۇيسەنالى بىقىبايەۆ جۋرناليستەرمەن بريفينگ وتكىزدى دەپ حابارلايدى qamshy.kz. بريفينگ بارىسىندا باسقارما باسشىسى وتكەن جىلدىڭ جۇمىستارىن قورىتىندىلاپ، جۋرناليستەردىڭ ساۋالدارىنا جاۋاپ قايتاردى.

دۇيسەنالى دىبىسالى ۇلىنىڭ ايتۋىنشا، جامبىل وبلىسىنىڭ وتكەن تاريحى جونىندەگى سان مىڭداعان دەرەكتەر مەن ناقتى قۇجاتتار وبلىسىمىزداعى مەملەكەتتىك ارحيۆتەردە ساقتالۋدا. مۇنداعى مول تاريحي قۇجاتتار قورى ولكەمىزدىڭ شەجىرەسى، التىن قورى.

جىل قورىتىندىسى بويىنشا وبلىس ارحيۆتەرىندە 4473 قوردا   880579 ساقتاۋ بىرلىگى جيناقتالدى.

ارحيۆ ماماندارىنىڭ باستى مىندەتتەرىنىڭ ءبىرى - ۇلتتىق ارحيۆ قورىن قالىپتاستىرۋ جۇمىستارى ءاردايىم ۇزدىكسىز ىسكە اسىرىلۋدا. ۆەدومستۆولىق ساقتاۋداعى قۇجاتتاردىڭ قۇندىلىعى ساراپتالىپ، ناتيجەسىندە وتكەن جىلى ارحيۆ قىزمەتكەرلەرىنىڭ ۇسىنۋىمەن 14962 تىزىمدەمەلەر قالىپتاستىرىلىپ، باسقارمانىڭ ساراپتاۋ-تەكسەرۋ كوميسسياسى وتىرىسىندا بەكىتىلدى.

بۇگىندە ارحيۆتەر ارنايى سەمينارلار وتكىزىپ، ناقتى ادىستەمەلىك كومەك كورسەتۋدى جۇمىس ستيلىنە اينالدىردى. وتكەن جىلدا ءىس جۇرگىزۋ، قۇجاتتاردىڭ ساقتالۋ ءتارتىبى بويىنشا 231 مەكەمەگە ادىستەمەلىك كومەك كورسەتىپ، 29 سەمينار وتكىزىپ، 1040 مەكەمەنىڭ ىستەر نومەنكلاتۋراسىنىڭ جۇرگىزۋ رەتى كەلىسىلدى.

ەسەپتى جىلى 19203 مۇراعات انىقتاماسى بەرىلىپ، الدىڭعى جىلمەن سالىستىرعاندا 11%-عا ءوستى.

ارحيۆ قۇجاتتارىن پايدالانا وتىرىپ ماڭىزدى، قىزىقتى فاكتىلەرگە بايلانىستى عىلىمي-كوپشىلىك كىتاپتار، ارحيۆ قۇجاتتارىنىڭ جيناقتارىن شىعارۋ جۇمىسى دا قارقىندى تۇردە جۇرگىزىلۋدە. بۇگىنگى كۇنگە دەيىن ارحيۆ قورى نەگىزىندە 20-عا جۋىق كىتاپ، ون شاقتى كىتاپشالار مەن جونسىلتەمەلەر شىعارىلدى. جامبىل وبلىسىنىڭ 75 جىلدىق تاريحى، ۇلى وتان سوعىسى جىلدارىنداعى وبلىستىڭ تىنىس-تىرشىلىگى،  مايدان حاتتارى، جامبىل وبلىسىنان شىققان سوۆەت وداعىنىڭ باتىرلارى، وبلىستاعى مونۋمەنتالدى ەسكەرتكىشتەر، ساياسي قۋعىن-سۇرگىن قۇرباندارى، اشارشىلىق قاسىرەتتەرى جەكە-جەكە كىتاپ بولىپ جارىق كوردى. سونىمەن بىرگە، تارازدا وتكەن قازاق حاندىعىنىڭ 550 جىلدىق تويى جانە تاۋەلسىزدىگىمىزدىڭ 25 جىلىنىڭ شەجىرەسى حرونيكا رەتىندە  جازىلىپ، كىتاپ بولىپ شىققانىن ەرەكشە اتاپ ءوتۋ كەرەك، - دەپ ءسوزىن قورىتىندىلادى د.بىقىبايەۆ.