ديماش قۇدايبەرگەن استانا قالاسىندا لارا فابيانمەن جانە اعايىندى مەلادزەلەرمەن دۋەت ورىندايدى.

عالامات كونسەرتتىك باعدارلاما 27 ماۋسىمدا وتەدى. مادەنيەت جانە سپورت مينيسترىلىگىنىڭ حابارلاۋىنشا، بيلەت الداعى ەكى اپتا ىشىندە ساتىلىمعا شىعادى.

مادەنيەت جانە سپورت مينيسترلىگى پرەسس-كونفەرەنسيا بارىسىندا ەكسپو-2017 كورمەسىندە وتەتىن ءىس-شارالار جايىندا حابارلادى. سولاردىڭ ءبىرى ديماش قۇدايبەرگەننىڭ الەمگە تانىلعان انشىلەرمەن قوسىلىپ ءان ايتۋى.

«ءبىز ديماش قۇدايبەرگەننىڭ جەكە كونسەرتىن بەرۋگە مىندەتتىمىز. كونسەرت 27 ماۋسىمدا وتەدى دەپ انشىمەن كەلىسىمگە قول قويدىق. «ديماش قۇدايبەرگەن شاقىرادى» كونسەرتى «استانا-ارەنادا» وتەدى»، دەپ حابارلادى مادەنيەت جانە سپورت ءمينيسترى ارىستانبەك مۇحامەدي ۇلى.

ديماشپەن بىرگە ۆالەريي جانە كونستانتين مەلادزەلەر، سونداي-اق لارا فابيان قوسىلىپ ءان شىرقايدى. اتالمىش انشىلەر دە كونسەرتتە ونەر كورسەتەتىنىن راستادى. قازىرگى ۋاقىتتا، باسقا اتاقتى الەم انشىلەرىمەن كەلىسسوزدەر جۇرگىزىلىپ جاتىر.

مالىمەتكە سۇيەنسەك، ەشبىر ءانشى جەكە ءان ايتپايدى. كەلگەندەردىڭ ءبارى دەرلىك ديماشپەن قوسىلىپ ءان ايتاتىن بولادى. سونداي-اق، كونسەرتكە كەلگەن شەتەل انشىلەرىنىڭ ديماش قۇدايبەرگەن جايلى دا، ەلىمىز جايلى دا حابارى بولۋى ءتيىس ەكەن.