ەستەرىڭىزدە بولسا،  ۇشىرىلعان «قازسات-1» عارىشقا بارىپ عايىپ بولىپ كەتكەنەن كەيىن، ارتىنان ىلە-شالا  «قازسات-2» ۇشىرىلدى. سەنسەڭىز دە، سەنبەسەڭىز دە وتىرىك ايتسام وزىمە ءتيسىن. سول «قازسات-2» عارىشقا ءساتتى جەتكەننەن كەيىن باياعىدا عارىشقا بارىپ قاڭعىپ كەتكەن اعاسى «قازسات-1»ء-دى سۇراستىرىپ ىزدەۋ سالىپتى. ەندى ءقايتسىن؟! تۋىستىق قانى جىبەرمەگەن بولار، ەكەۋى دە رەسەيلىك ءبىر زاۋىتتىڭ قۇرساعىنان شىقتى ەمەس پە؟! وزىنەن بەس جاس ۇلكەن اعاسىنىڭ قايتىس بولسا قاڭقاسىن، ءتىرى بولسا تەمىرىن ىزدەپ تابۋعا بەل بايلاپتى.

عارىشقا جاڭادان قادام باسقاندىقتان ءوزىم دە اعام سياقتى اداسىپ كەتپەيىن دەپ بۇلاردان الدەقايدا ەرتە كەلگەن جاپون جاساندى جەرسەرىگى «جاپسات»-قا وسىدان بەس جىل بۇرىن جوعالىپ كەتكەن اعاسىنىڭ دەرەگىن ءبىلىپ بەرۋگە قولقا سالىپتى. ءبىراق، «جاپسات»:

– ساعان كومەكتەسكەنىمدى بىلسە سامۋرايلار ساقالىمدى قىرقادى. رەنجىمە، باۋىرىم، مەنىڭ ۋاقتىم جوق، – دەپ شىعارىپ سالىپتى.

امالى تاۋسىلعان «قازسات-2» «ەندى ءبىر كومەكتەسسە وسى كومەكتەسەر، پىسىق حالىقتىڭ ۇلى عوي» دەپ جۇڭگو جەرسەرىگى «قىتسات»-قا بارىپ اعاسىن تابۋعا كومەكتەسۋدى ءوتىنىپتى. «قىتسات» ىشىنەن ءبىر قۋلىق ويلاپ ءارى «قازسات-2»ء-نىڭ ەشتەڭە بىلمەيتىن، جەر شارىنان جاڭا كەلگەن اڭقاۋلىعىن پايدالانىپ قالۋدى كوزدەپتى. «اعاڭدى مەن تاۋىپ بەرەم» دەپ جىلى سوزدەرىمەن، جۇمساق مىنەزىمەن ءجىبىتىپ وتىرىپ، «قازسات-2»-گە عارىشقا بارىپ جۇمىس ىستەۋى ءۇشىن قالتاسىنا سالىپ بەرگەن قازاقتاردىڭ 115 ملن. دوللار اقشاسىنىڭ جارتىسىن سىپىرىپ الىپتى دا ءوزىن جولعا سالىپتى. «قىتسات»-تان ءجابىر كورگەن «قازسات-2» «ءبىر جاردەم ەتسە وسى جاردەم ەتەر» دەپ عارىشتىڭ تۇراقتى تۇرعىنىنا اينالعان امەريكا جەرسەرىگى «اميرسات»-قا بارىپ جاعدايىن ءتۇسىندىرىپ، قولعابىس ەتۋدى سۇراپتى. «اميرسات» باسقالارىنا قاراعاندا ەلپەك كورىنىپتى. «قىتسات»-تى ادامدىق قۇقىققا قول سۇقتى دەپ ايىپتاپ، «قازسات-2»-گە اعاسىنىڭ دەرەگىن ايتىپتى. 

ونىڭ ايتۋىنشا، «قازسات-1» جەردەگى قازاقتارعا: «مەنى عارىشقا ۇشىرىڭدار سوندا سەندەر تەلەفونمەن تەگىن سويلەسەسىڭدەر ءارى اۋىلدا وتىرىپ-اق الپىس كانالدى تەلەديداردان تەلمىرىپ وتىرىپ تاماشالايسىڭدار» دەپ ۋادەنى ءۇيىپ بەرىپتى. كەلسىمشارت جاساپ 65 ملن. دوللار ساناپ الىپ، جەردەن الدەقايدا الىستاپ كەتكەسىن ءبىر كۇندە قازاقتارعا كورىنبەي عايىپ بولىپتى دا «اميرسات»-تىڭ قاسىنا كەلىپتى.

«قازسات-1» مەن «اميرسات» بىرگە تۇرادى ەكەن. سول جەردە «قازسات-2» مەن اعاسى «قازسات-1» «وي، باۋرىمداپ» قۇشاقتاسىپ كورسىپتى.

«اميرسات» جۇمىس ۋاقتى باستالعانىن جەردەگى وتانداستارى وزىنەن حابار كۇتىپ وتىرعانىن ايتىپ  اعايىندى ەكەۋىن وڭاشا قالدىرىپ جۇمىسىنا كەتىپتى. وڭاشا قالعان «قازسات-1» ىنىسىنە:  

– سەن دە ءبىر كۇندە قازاقتاردى كوز جازدىرىپ كەت، –  دەپ اقىل ايتىپتى. وعان «قازسات-2» قازاقتاردىڭ وزىنە باقىلاۋدى كۇشەيتكەنىن ايتىپ باس تارتىپتى. سوندا دا «قازسات-1» قويماي:

– سەن الاتىن كوپ اقشاڭدى الدىڭ. ەندى نەسىن قورقاسىڭ؟ جۇمىسقا ايىنا ەكى رەت شىقساڭ بولدى ەمەس پە؟ –  دەپ اعالىق اقىلىن ايتىپتى. وعان «قازسات-2 قازاقتاردان ۇيات بولماي ما؟» دەسە كەرەك، «قازسات-1»: 

– قاراۋسىز قالعان قازەكەڭنىڭ بايلىعىن كىم توناماي جاتىر دەيسىڭ ءتايىرى، اناۋ قاسقا باس ءابليازوۆ  ۇيالماعاندا ءبىز ۇيالامىز با؟ – دەپ زەكىپ تاستاعان كورىنەدى. سودان باستاپ «قازسات-2» دە تولىق جۇمىس ىستەمەگەندىكتەن جەردەگى ءبىزدىڭ تەلەفون جالعاعاندا بىرىلگىمىزدىڭ ءبىر مينۋتتا بىلىنبەي مينۋسقا سىرعىپ كەتەتىنى سودان بولسا كەرەك. 

وسى اڭگىمەنى وتكىر قۇلاعىم ەستىگەندە تاقىر باسىمنىڭ توبەسىنە ءبىر وي كەلدى. قادىرمەندى ۇشقىش قازاقتار! ءبىز قۇرعىر «قازسات-3»ء-تى ۇشىرماي-اق قويايىقشى، ول دا ورىستىڭ قولىنان شىققان قۋ عوي، اقشانى الىپ العاسىن الدىنداعى ەكى اعاسىنىڭ تىرلىگىن قايتالاماسىنا كىم كەپىل؟.. سوسىن ءبىز قالا بەرەمىز باسىمىزدى قۇشاقتاپ. اقشا دا جوق، اپپارات تا جوق....

جارقىنبەك ءجۇمادىل