جاعا ۇستاتار وقيعا كەزەكتى رەت قىتايدا ورىن الدى. 24 جاستاعى قىز ءوز ءۇيىنىڭ جەرتولەسىندە 6 جىل بويى قامالىپ وتىرعان. سونداعى سەبەپ، قىزدىڭ ءجۇرىپ جۇرگەن جىگىتى اتا-اناسىنا ۇناماعان ەكەن.

چجان ءسيدىڭ سۋرەتتەرى اپساتتە عالامتور بەتىندە جاريالانىپ ۇلگەردى. سۋرەتتەردەن قىزدىڭ  تاماق قالدىقتارىنىڭ جانىندا ءال-قۇتى قالماي جاتقانىن بايقاۋعا بولادى. اتا-اناسى قىزدارىنىڭ جىگىتىمەن ارالاسپاۋى ءۇشىن قولدارىنان كەلگەنىنىڭ ءبارىن ىستەپ باققان.

قىزدىڭ جىگىتىمەن ايىرىلىسقانى اتا-انا ءۇشىن جەتكىلىكسىز بولعان سەكىلدى. ولار قىزدى جەرتولەگە قاماۋدى ءجون كورىپتى. 1 كۇنگە، ءتىپتى 1 ايعا ەمەس، باقانداي 6 جىلعا.

اۋىل تۇرعىندارىنا قىزدىڭ اتا-اناسى قىزىمىز پسيحولوگيالىق احۋالعا ۇشىرادى، ەشكىممەن ارالاسا المايدى دەپ سىلتاۋراتقان. تۇرعىنداردىڭ ايتۋىنشا، ولار اتا-اناسىنا سەنبەگەن، قىز بىرنەشە مارتە جەرتولەدەن شىعۋعا تىرىسقانىمەن، ەرلى-زايىپتىلار ونى قايتا قاماپ تاستايتىن. ادامدار بۇل ارەكەتتىڭ تالاي كۋاسى بولعان، قىزدى قۇتقارۋعا تىرىسقان. الايدا، اتا-اناسى ءوزىمىزدىڭ جەكە شارۋامىز دەگەندى العا تارتىپ، كورشىلەرىنە بوگەت كەلتىرگەن.

اۋىلدىڭ ءار تۇرعىنى بۇل جاعدايدان حاباردار بولعان. الايدا، تۇرعىنداردىڭ ءبىرى قالاي دا كومەكتەسۋگە بەل بايلايدى. اتا-اناسىنىڭ نە ويلايتىنى ونى تولعاندىرمادى، تەك قىزدى سول قاپاستان الىپ شىققىسى كەلدى. قىزدىڭ جاعدايى ونى الاڭداتتى، سول سەبەپتى پوليسەي قىزمەتكەرلەرىنە ونىڭ جاعدايىن كقرسەتۋ ءۇشىن سۋرەتكە ءتۇسىرىپ الادى.

«سول ساتتە قىتايدا جاڭا جىل تويلانىپ جاتقان. ەلدىڭ ءبارى ابىر-سابىر بولىپ مەرەكەنىڭ قىزۋىنا باتقاندا، مەن سول ۇيگە تىعىلىپ كىرىپ، قىزدىڭ قانداي جاعدايدا ەكەنىن ءبىلدىم. بەيشارا قىز سابانداردىڭ اراسىندا جاتىر ەكەن. جانىندا شاشىلىپ جاتقان تاماقتىڭ قالدىقتارى. اتا-اناسىنىڭ پسيحولوگياسىندا ءبىر اۋتىقۋ بارىنا سەنىمدىمىن. پوليسەي قىزمەتكەرلەرى ءبىر شارا قولدانار دەپ ۇمىتتەنمىن» دەيدى 50 جاستاعى چوۋ دجەن.