قازاقستاندىق ماكسيم ارىشيەۆ سانكت-پەتەربۋرگ مەتروسىندا بولعان جويقىن جارىلىستا كوز جۇمعان بولاتىن. 20 جاستاعى ماكسيم سانكت-پەتەربۋرگ مەملەكەتتىك ەكونوميكالىق ۋنيۆەرسيتەتىنىڭ 3 كۋرسىنىڭ ستۋدەنتى ەكەندىگى انىقتالعان ەدى. ال بۇگىن جارىلىس ورنىندا ياعني «سەننايا پلوشاد» ستانسياسىندا ەسكەرتكىش تاقتايشاسى ورناتىلاتىن بولادى دەپ حابارلايدى «قامشى» اقپاراتتىق اگەنتتىگى. بۇل جايىندا ماكيمنىڭ دوسى رومان زەدەلاشۆيلي ءوزىنىڭ «ۆكونتاكتە» الەۋمەتتىك جەلىسىندەگى پاراقشاسىندا جازبا قالدىردى. «ارىشيەۆ ماكسيم ۆيتاليەۆيچ. 18.08.1996 ج. - 03.04.17 ج. ماعان باۋىر بولىپ ەتكەن ادام ءارى جاي عانا جاقسى ازامات. تىنىشتىعىمىز مەن بەرەكەمىزدى كەتىرگەن وسى ءبىر بىرنەشە ساعات كەزىندە ماكسيمدى جاي تانيتىندار مەن دوستارى كوپ جازدى. بارلىعى ماكسيممەن قالاي قوشتاسامىز، قانداي كومەك بەرە الامىز دەپ سۇرادى. بارشاڭىزعا ايتارىم: قولداۋلارىڭىزعا كوپ راقمەت! بۇگىن ياعني ءساۋىردىڭ 5ء-سى كۇنى كەشكى ساعات سەگىزدە «سەننايا پلوششاد» ستانسياسىندا ەسكەرتكىش تاقتايشاسى ورناتىلاتىن بولادى».

سونىمەن قاتار ماكسيمنىڭ دوسى يۋريي رومانوۆ ونىڭ ولىمىنە وقۋ ورنىن دا كىنالاپ وتىر. ونىڭ ايتۋىنشا، ءتارتىپ ساقتالىنىپ، ەشكىم سوڭعى پاردان قاشىپ كەتپەگەندە ماكسيم دە ءتىرى قالاتىن ەدى. سەبەبى سول كۇنى ماكسيم ءتورتىنشى پارعا قاتىسپايمىن دەپ شەشىپ، كۇندەلىكتى ادەت بويىنشا مەتروعا وتىرىپ ۇيىنە قايتپاقشى بولادى. «بىزدە سەگىز ادام عانا ساباققا باراتىن. بىلايشا ايتقاندا، ماكسيم ساباقتى جاقسى وقىعاندىقتان قايتىس بولدى» دەيدى يۋريي.