«قازاقستان» تەلەارناسىندا ءومىردىڭ سىنىنا ۇشىراپ، باسقا تۇسكەن قيىندىقتارمەن ارپالىسىپ جۇرگەن ادامداردىڭ تاعدىرى تالقىعا سالىناتىن اتاقتى «ايتۋعا وڭاي» باعدارلاماسى بارىمىزگە ءمالىم. بىرنەشە تاعدىرلارعا قولداۋ كورسەتىپ، قول ۇشىن سوزاتىن باعدارلاما بۇل جولى ماسكەۋدە كۇڭدىكتە بولعان قىزدار جايىندا ءسوز قوزعادى.

«قامشى» اقپاراتتىق اگەنتتىگى جۇمىس ىستەيمىن دەپ الدانعان قازاق قىزدارىنىڭ قيىن تاعدىرى جايىندا دەرەكتەردى وقىرمان نازارىنا ۇسىنادى.

وتباسى قۇندىلىعىن جاقسى تۇسىنەتىن ايدانا - وقو تۇرعىنى. اتا-اناسىنا جەڭىلدىك بولسىن دەگەن نيەتپەن جۇمىس ىزدەيدى. بولاشاق قوجايىنىىنىڭ قىزى العاشىندا بالا كۇتۋشى ىزدەگەنىن ايتىپ جۇمىسقا ورنالاسىرادى. «ەكى-ۇش اي ىستەسەڭ، ايلىعىڭدى دا الاسىڭ، تەگىن تاماقتاناسىڭ» دەگەنگە الدانعان قىز بىردەن كەلىسە كەتەدى.

ايتا كەتەرلىگى، جۇمىس ۇسىنعاندار ءوزىمىزدىڭ قازاقتار بولعان ەكەن. سول سەبەپتى دە قىزعا اناسى رۇقسات ەتكەن. ءسويتىپ، ايدانا ماسكەۋگە كەلگەن كۇنى-اق كيىمدەرىن، قۇجاتتارىن، تەلەفونىن الىپ قويعان ەكەن.

«ەڭ بولماعاندا اناما امان-ەسەن جەتكەنىمدى ايتايىن دەسەم، سويلەسۋگە رۇقسات بەرمەدى. ماعان جۇماققا كەلگەن جوقسىڭ، جۇمىس ىستەۋگە كەلدىڭ دەپ دورەكىلىك تانىتتى. سول كۇنى ءبىر كەسەگە اراقتى تولتىرىپ قۇيىپ بەرىپ، زورلاپ ىشكىزدى. ءبىر قوراپ تەمەكىنى الدىما ءتىزىپ قويىپ وسىنى بىتىرمەگەنشە تۇرما دەپ قينادى. ول كەزدە مەن ءالى 17-دەمىن. ونداي جامان ادەتتەردەن اۋلاق ەدىم»، دەپ وتكەنىن وكىنە وتىرىپ ەسىنە ءتۇسىردى ايدانا. ءۇڭىلىپ قاراعان ادامعا ايدانانىڭ دەنەسىندە ماسكەۋدەن قالعان ەستەلىكتەر كوپ.

دۇكەن يەلەرى قىزداردى ابدەن ازاپتاعان. تانىنەن قان شىقپايىنشا تىنىشتالماعان. بىردە وزگە قىزدىڭ قاشىپ شىعۋىنا كومەكتەسپەك بولعان ايدانانى دۇكەن يەسى ىستىق سۋعا كۇيدىرىپ، سودان مۇزداتقىشقا ەكى ساعاتقا قاامپ قويعان. ايدانامەن قوسا دۇكەندە 15 قىز-جىگىت جۇمىس ىستەگەن.

كەلەسى كەيىپكەر – زارينا ءاشىروۆا. ول 16 جاسىندا ماسكەۋگە بارعان ەكەن. بۇل قىزدىڭ دا ماسكەۋگە بارۋداعى ماقساتى سول – اناسىنا قارجىلاي كومەكتىسكىسى كەلگەن. بارا سالا بار مۇلكىن الىپ العان. زورلاپ اراق ىشكىزگەن. جۇمىس ىستەپ جۇرگەن قىز-جىگىتتەردى بىر-بىرىمەن سويلەستىرمەگەن. وندايلارىن بايقاپ قالسا، جازالاعان.

سونداي-اق سول دۇكەندەگى ەر ادامدارعا قىزداردى ادەيى زورلاتادى ەكەن.

«ول جەردە قىزداردى زورلايدى. ءوز ەركىڭ وزىڭدە ەمەس. داۋىس شىعارىپ ايعايلاتپايدى. مەنى جانسۇلۋدىڭ (اپالى-سىڭلىلەردىڭ ءبىرى) اپكەسىنىڭ بالاسىمەن قوستى»، - دەيدى زارينا.

ال، سول جەردەگى جىگىتتەردى ناشاعا وتىرعىزىپ تاستايدى ەكەن.

زارينانى اناسى جۋرناليستەر مەن ەرىكتىلەردىڭ كومەگىمەن 2012 جىلى كۇڭدىكتەن الىپ شىققان. ومەن قوسا 10 ادام بوساتىلدى. كەيبىر قىزدارىمىز بالالى بولىپ كەلگەن. بولعان وقيعانى قىزدار راستاپ وتىر. اپكە-سىڭلىلەرىنە وزدەرىنىڭ باسىنان وتكەرگەن قاتەلىكتى قايتالاماۋلارىن ءوتىنىپ سۇرادى.