بىردە فەيسبۋكتەگى پاراقشامدى اقتارىپ وتىرىپ، جاسى 25-30-دار شاماسىنداعى قىزدىڭ سۋرەتىن كوزىم شالدى. ەسىمى ايشا. سۋرەتىنىڭ استىندا «ومىردەن ءوزىن ىزدەگەن ايەل» دەگەن جازبا بولدى. ءوزى اق جەيدە كيگەن، موينىنا كۇلگىن ءتۇستى ورامال بايلاعان. بەتىندە ءبىر بوياۋ جوق، ءسال بوزارىپ تۇرسا دا، تابيعي سۇلۋلىعى باسىم. بارىنەن بۇرىن كوڭىلىمدى اۋدارعان ونىڭ كوزدەرى بولدى. تۇڭعيىق كوزدەر... ءتىپتى، سۋرەتتىڭ وزىنەن بۇل كوزدەردىڭ ومىرگە دەگەن قۇشتارلىعى مول تەرەڭ ويلى ادامعا تيەسىلى ەكەنىن اڭعارۋعا بولادى. سونداي-اق، قوڭىر كوزدەرى شاشىنىڭ تۇسىمەن ادەمى ۇيلەسكەن. كورسەڭىز عوي، كوزقاراسىنان ومىرگە دەگەن جىگەرلىك پەن ماحابباتتى اڭعارار ەدىڭىز. بۇل كوزدەردى كورگەن جان ۇمىتا الماس ەدى. 1 ساعات وتسە دە نازىك كۇلكىسىمەن باۋراعان تۇنىق كوزدى قىزدىڭ بەينەسى كوز الدىمدا تۇردى. پاراقشاسىنا قايتا كىردىم. ءوزىن جاقىنىراق تانىعىم كەلدى. كوزبە-كوز كورىسپەسەم دە...

سۋرەتتەرىن اقتارىپ وتىرىپ تاعى ءبىر كىشىگىرىم جازباسىن كوزىم شالدى. ءومىر جايلى جازىپتى. تاعدىرعا باعىنۋدى ءجون سانايدى ەكەن، ءومىردى سول قالپىندا قابىلداۋ كەرەك دەيدى. «تاعدىردىڭ ءار سوققىسىنا سابىرلىق تانىتقان ءجون، ول سىزگە نە دايىنداسا دا، قابىل الىڭىز» دەلىنگەن جازباسىندا.

 ءارى قاراي ءومىردى سۇيەتىنىن جانە موينىنا ارتىلعان جۇكتى سوڭىنا دەيىن كوتەرەتىنىن جازىپتى. بۇل جازبالارى مەن سۋرەتتەن كورگەن قىزعا، مەن ەلەستەتكەن بەينەگە مۇلدەم ساي كەلمەيدى. نەگە وسىلاي جازعانىن بىلگىم كەلدى، جاقىنىراق ارالاسقىم كەلدى، سوزدەرىنىڭ ءمانىن تۇسىنگىم كەلدى. ءبىر سىردىڭ بارىن سەزگەم. ءسويتىپ، الگى قىز مەنىڭ دوستىعىمدى قابىلدادى. پاراقشاسىن اشىپ، جاڭاعى جازعان جازباسىنا كەلىسپەيتىنىمدى جازىپ جىبەردىم. «ادام ءوز بولاشاعىن ءوزى قالىپتاستىرۋى كەرەك، تاعدىرعا مويىنۇسىنۋعا بولمايدى» دەدىم. ءبىراق جازعانىما جاۋاپ كەلمەدى. 2 كۇن كۇتتىم. پاراقشاسىنا كىرىپ، سۋرەتتەرىنە سۇيسىنە قارايتىنمىن. جۇرەگىمدە ءبىر وزگەرىستىڭ بارىن بايقادىم، ءبىر جاعىنان الگى جازبانى بەكەر جازعان ەكەنمىن دەپ تە وكىندىم. تەك ءۇشىنشى كۇنى ايشادەن جاۋاپ كەلدى. جازباسىندا ءبارى ادامنىڭ قالاۋىنداي بولا بەرمەيدى دەلىنگەن. ەرتەڭ تۇسكى ۋاقىتتا مەشىتتىڭ الدىنا كەلۋىمدى ءوتىنىپتى. ودان سوڭ ءلام-ميم دەمەدى. مەن دە مازالامادىم.

ەرتەڭگى كۇنى بەلگىلەنگەن ۋاقىتتا قالالىق مەشىتتىڭ الدىنا باردىم. كولىگىمنەن تۇسپەس بۇرىن اينالاعا ءبىر كوز سالىپ شىقتىم. كەيبىرىنىڭ نامازعا اسىعىپ بارا جاتقاندارىن بايقادىم، كەيبىرى جول بويىندا قايىر تىلەپ وتىردى. ءبىر ۋاقىتتا ازانشىنىڭ داۋسىن ەستىدىم، الايدا ەشقانداي ەرەكشەلىكتى بايقامادىم. ءسويتىپ، كولىگىمنەن شىقتىم دا، مەشىتتىڭ كىرە بەرىسىنە قاراي ادىمداپ كەلەمىن. قايىر تىلەپ وتىرعاندار قولدارىن سوزىپ، اقشا بەرۋىمدى ءوتىنىپ جاتتى. ارالارىندا مۇگەدەكتەرگە ارنالعان اربادا ورامال تاعىپ، قارا كۇرتەشە كيىپ وتىرعان ايەلدى دە بايقادىم. الدىندا تۇرعان قوراپشاعا تيىن تاستادىم. «ءسىز ماعان جانە مەن سەكىلدى بىرنەشە ادامعا ءۇمىت سىيلادىڭىز. ياعني، اللا ءسىزدى ماعان قۇتقارۋشىم رەتىندە ادەيى جىبەرىپ وتىر. ءسىزدىڭ بۇل تيىنىڭىز – اللانىڭ بەرگەنى، سوندىقتان قاسارىسپاي قابىلدايمىن» دەپ الگى قىز ورامالىن شەشىپ، جىميا قارادى.

قۇدايىم-اي، ول ايشانىڭ ءدال ءوزى عوي. سول كوزدەر، سول بوزارعان بەينە، شاشى ءدال سۋرەتتەگىدەي ورىلگەن. ودان كوزىمدى الماي قاراپ قالىپپىن، نە ىستەرىمدى بىلمەي دالمىن. كەشە سۇلۋلىعىنا تاڭىرقاپ قاراعان قىز الدىمدا قايىر تىلەپ وتىرادى دەگەن وي ءۇش ۇيىقتاسام دا تۇسىمە كىرمەگەن. ابدىراپ قالعان ءجۇزىمدى قىز دا بايقادى.

-تۇرىڭىزگە قاراسام كوڭىلىڭىز قالعان سەكىلدى. مەنى تۇننگى كلۋبتاردىڭ بىرىندە كورەم دەپ ويلاعان بولارسىز؟ - دەدى.

نە دەرىمدى بىلمەگەن مەن قالتامنان 5 مىڭ تەڭگە شىعارىپ، قولىنا ۇستاتىپپىن. ءبىراق، ول المادى.

-ەندى بۇنىڭىز اياۋشىلىققا جاتادى. ال ماعان ەشكىمنىڭ دە اياعانى كەرەك ەمەس. ءقازىر ۇيىڭىزگە بارىپ مەنى دوستارىڭىزدىڭ قاتارىنان ءوشىرىپ تاستارسىز. ءبىراق ول مەنىڭ ءومىرىمدى وزگەرتپەيدى. مەنىڭ مىنا ارباعا تاڭىلعانىما ون جىل بولدى. سول كۇنگى جول اپاتىنان كەيىن ءۇمىتىمنىڭ ءبارى ءسوندى. قۇداي مەنى اتا-اناممەن قوسا، ەكى اياعىمنان دا ايىردى. انانىڭ قۇربىسىنا العىسىم شەكسىز، سول كىسىنىڭ قامقورىندامىن. ول دا جالعىز، مەن دە جالعىزبىن. مەنىڭ اتا-انام جوق، ونىڭ بالاسى جوق. ەكەۋمىز ءبىر-بىرىمىزدى ءدال تاپقاندايمىز. مۇگەدەكتىك بويىنشا مەنىڭ الاتىن زەينەتاقىم مەن ونىڭ زەينەتاقىسى ەكەۋمىزگە جەتپەيدى، سول ءۇشىن ءار جۇما سايىن وسىندا كەلىپ قايىر تىلەيمىن. وسىندا وتىرىپ ادامداردى باقىلايمىن. ولاردىڭ كوزدەرىندە اياۋشىلىق جوق، بىزگە تيىن تاساتۋدى قۇلشىلىق الدىنداعى ءراسىم دەپ تانيدى، سول ءۇشىن ءبىزدى كوزدەرىنە ىلمەستەن تيىندارىن تاستاپ ءوز جوندەرىمەن كەتە بەرەدى. ال، ءسىزدىڭ اۇشاڭىزىد قابىلداي المايمىن. ەگەر، شىن كومەكتەسكىڭىز كەلسە، مەنى ۇيىمە اپارىڭىز. الىس ەمەس، وسى ماڭايدا.

مەن ءۇنسىز عانا اربانى سۇيرەپ، ول كورسەتكەن جولمەن ءجۇرىپ كەلەمىن.  10 مينۋتتان سوڭ ەسكى ءۇيدىڭ الدىنا كەلىپ توقتادىق. ول ماعان بىردەڭە ايتقىسى كەلگەندەي تەسىلە قارادى.  ءسويتىپ، العىسىن ايتتى دا ءوز جونىمەن كەتە باردى. ەسكى ءۇيدىڭ الدىندا ونى اق شاتى ايەل ادام كۇتىپ تۇردى.

-ايشا، توقتاڭىز! مەن بىرنارسەنى مويىنداۋىم كەرەك. ءسىز ماعان قاتتى ۇناپ قالدىڭىز. بۇگىن كوپ نارسەگە كوزىم جەتتى، ءسىزدىڭ ومىرگە دەگەن قۇشتارلىعىڭىز مەنى تاڭ قالدىردى. وتىنەمىن، قيندىققا بوي الدىرماڭىز، قول ۇشىن سوزعان ادامداردىڭ بەتىن كەرى قايتارماڭىز، ول ءسىزدىڭ ءومىرىڭىزدى وزگەرتۋى مۇمكىن عوي.

-جوق، ءسىز قۇداي ەمەسسىز. جانە ءوز اياعىممەن ءجۇرىپ كەتەتىن مۇمكىندىك جاساي المايسىز.

ء-بىراق، مەن سىزگە باسقا جاعىنان كومەكتەسە الامىن. مىنا اربادا وتىرساڭىز دا، بويىڭىزداعى كەمىستىكتى بايقاماساڭىز ەكەن دەيمىن.

-سوندا قالاي؟ ماعان ۇيلەنەسىز بە؟

-كەشە سۋرەتتەرىڭىزدى قاراپ وتىرىپ، ءسىزدى قاتتى كورگىم كەلدى. الدىمدا ءدال مەن قالاعانداي دانا ءارى سۇلۋ ايەل تۇر. ءۇمىتىم اقتالدى.

-مەن سىزگە بەكەر ماسىل بولامىن. مۇگەدەك اداممەن تۇرعاننىڭ قانداي قيىن ەكەنىن سەزىپ تە تۇرعان جوقسىز. ال، اناۋ تۇرعان ايەل ونى وتە جاقسى بىلەدى، - دەپ ءبىز جاققا قاراپ تۇرعان اق شاشتى ايەلدى نۇسقادى. بارعان سايىن ول قىزعا دەگەن سەزىمىم ارتا ءتۇستى، ءدال ماگنيت سەكىلدى وعان قاراي تارتىلا بەردىم. توڭىپ قالعان قولدارىن ۇستاپ، ءسۇيدىم...

ء-وز جولىڭىزدى تابىڭىز. مەنى ۇمىتىڭىز! – دەدى دە قىز بۇرىلىپ كەتىپ قالدى. ونى ەسىك الدىندا تۇرعان ايەل كۇتىپ الىپ، ءۇي ىشىنە كىرگىزدى. كىرىپ بارا جاتىپ ەكەۋنىڭ دە كوزدەرى مەندە بولدى. ءبىرى اياۋشىلىقپەن قاراسا، ءبىرى قايعىرا قارادى. مەن جاي عانا قولىمدى بۇلعادىم دا، ءوز كولىگىمە كەلدىم.

ارادا ءبىر اپتا ءوتتى. ايشا تۇراتىن ۇيگە كەلدىم. دۋالى وزگەرگەن، باقشاسىنداعى گۇلدەردى ارامشوپتەر باسىپ قالعان. ەسەسىنە ءۇيىنىڭ ءىشى اعارىپ، قابىرعالارى بويالعان. ايشانىڭ بولمەسىندە جاڭا كومپيۋتەر تۇر، ەسكىسى دۇرىس ىستەمەيتىن. اپتاسىنا ءبىر ۋاقىت ايشاعا كوسمەتولوگ-ستيلشى كەلىپ تۇرادى. ال توڭازىتقىش شە؟ ىشىندە ەڭ كەرەكتى دەگەن ازىق-تۇلىك قانا. ءتىپتى، بوس تۇر دەسە دە بولادى.

ەكەۋمىزدىڭ العاشقى كەزەدسۋىمىزدىڭ ەرتەڭىندە-اق ايشا مەنى ۇمىتقىسى كەلگەن. ءبىراق مەن قايتا كەلدىم... ونىڭ جۇزىنە قارادىم دا، جاي عانا: «مەن قۇداي ەمەسپىن! الايدا ساعان كومەكتەسە الاتىنداي قاۋقارىم جەتەدى»، دەدىم.

اسىل ساعىمبەكوۆتىڭ فەيسبۋك پاراقشاسىنان الىنعان جازبا

اۋدارعان: گۇلىم جاقان