وڭتۇستىك قازاقستان وبلىسى، تۇلكىباس اۋدانى، تۇرار رىسقۇلوۆ اۋىلىندا ءۇش رەت ەگىزدى بولعان اناعا «التىن القا» تابىستالدى، دەپ حابارلايدى «قامشى» اقپاراتتىق اگەنتتىگى وڭتۇستىك قازاقستان وبلىسى اكىمدىگىنىڭ مالىمەتىنە سۇيەنە وتىرىپ.

عالبيات عالىمنىڭ وتباسىندا 8 ۇل-قىز ءوسىپ كەلەدى. ونىڭ 30 جاستان اسقان جاس جۇبايى – ءۇش رەت ەگىز پەرزەنتتى دۇنيەگە اكەلگەن باتىر انا. جاستا بولسا باتىر انا اتانعان ۇلبوسىن جاسىمبەكوۆانى تۇلكىباس اۋدانىنىڭ اكىمى ن.تۇراشبەكوۆ ارنايى قابىلداپ، «التىن القا» تاقتى.

جاس وتباسى 2012 جىلى «ديپلوممەن اۋىلعا» باعدارلاماسى بويىنشا تۇرعىن ۇيمەن قامتىلعان. بۇگىندە ەگىزدەردىڭ اتا-اناسى  اۋداندىق ەمحانادا  دارىگەر بولىپ ەڭبەك ەتەدى.

«التىن القا» ءتوس بەلگىسىن يەمدەنگەن كوپبابالى انانى اۋدان اكىمى قۇتتىقتاي وتىرىپ، ەل دەموگرافياسىنىڭ ارتۋىنا سۇبەلى ۇلەس قوسقانى ءۇشىن العىسىن ايتتى. سونىمەن قاتار، ول ادامزات بالاسىنىڭ بارلىعىنا دا جارىق دۇنيە سىيلاعان اناعا قۇرمەت كورسەتۋ-پارىز ەكەنىن ايتىپ،  بۇگىندە مەملەكەتتە انا مەن بالاعا بارىنشا جاعداي جاساپ، جان-جاقتى قولداۋ كورسەتۋگە دەن قويعانىن جەتكىزدى.

دارىگەر جاس وتباسىلاردىڭ تۇڭعىش قىزدارى ارۋجان 4-سىنىپتا وقىسا، ەگىز قىزدارى قىمبات پەن سىمبات 7 جاسقا اياق باستى. ودان كەيىنگى ەگىزدەرى - ۇلجان مەن ۇلپان 5 جاستان استى. ال، اقارىس اتتى ۇلدارى 3 جاستا بولسا،  2015 جىلى بۇل باتىردىڭ ىزىنەن ەگىز ىنىلەرى بەكارىس پەن جانارىس ەسىمدى بالاقايلار دۇنيەگە كەلگەن.