ەلىمىزدى الەمگە تانىتىپ جۇرگەن انشىلەرىمىزدىڭ ءبىرى – قىتايدا باعىن سىناپ جۇرگەن ديماش قۇدايبەرگەن. الەمنىڭ تانىمال تۇلعالارى ديماش ارقىلى قازاقتىڭ مادەنيەتىمەن، تىلىمەن تانىستى. قازاقتىڭ عانا ەمەس، الەمنىڭ انشىسىنە اينالدى.
وسىعان بايلانىستى ەلىمىزدىڭ انشىلەرى ديماش قۇدايبەرگەن جايىندا پىكىرلەرىن ءبىلدىردى. بۇدان بۇرىن قايرات نۇرتاس ديماشتى ءوز ءانىن تاپپاعاندىقتان ەلدە باعالانباعانىن ايتقان. بۇل جولى روزا رىمبايەۆا دا ءسوز قوزعاپتى. ونىڭ ايتۋىنشا، ديماش الەمگە تانىلسا دا، قازاقتىڭ سۇيىكتى انشىسىنە اينالۋ مۇمكىندىگى از، دەپ حابارلايدى "قامشى" اقپاراتتىق اگەنتتىگى.
قازاقستاننىڭ حالىق ءارتىسى «جۇلدىزدار وتباسى» جۇرنالىنا بەرگەن باسىلىمنىڭ «ديماش قازاق ونەرىن الەمگە تانىتا الا ما» دەگەن ساۋالىنا بىلاي دەپ جاۋاپ بەردى.
«بۇل تۋرالى كەسىپ-پىشىپ بولجام ايتۋ قيىن. ويتكەنى، بولاشاقتا نە بولارىن بىلمەيمىز. ءبىر انىعى، ديماشتىڭ ەلىمىزدە حالىقتىڭ سۇيىكتى ءانشىسى اتانۋىنا مۇمكىندىك از. سەبەبى، ءبىزدىڭ تەليەۆيزيالىق جوبالاردىڭ بارلىعى تويدىڭ انشىلەرىن عانا ناسيحاتتايدى. سولاردى ماقتاپ، سولاردى كوككە كوتەرەدى. جوعارى دەڭگەيدەگى شىن تالانتتاردى كورسەتەتىن تەليەۆيزيالىق جوبالار جوقتىڭ قاسى. وتاندىق تەلەارنالار «تويدۋمان»، «تويبازار»، «تويباستار» سەكىلدى تويدىڭ باعدارلامالارىنان ارى اسا المايدى. الدىمەن ەكرانىمىزدى وسىنداي ماعىناسىز شوۋلاردان تازالاپ، ديماش سەكىلدى تالانتتىلاردىڭ ونەرىن دارىپتەپ، جاستارعا ۇلگى ەتۋىمىز كەرەك».
