نۇرسۇلتان نازاربايەۆ ۇلتتىق بانكتىڭ جۇمىس قورىتىندىسىن تالقىلاۋ كەزىندە ۇكىمەت پەن ەكىنشى دەڭگەيلى بانكتەرگە قازاقستاندىقتاردى ماسىلدىق ادەتىنەن ارىلتۋدى تاپسىردى، - دەپ حابارلايدى «قامشى» اقپاراتتىق اگەنتتىگى Tengrinews.kz تىلشىسىنە سىلتەمە جاساي وتىرىپ.

"قايتا قارجىلاندىرۋ باعدارلامالارىنا 130 ميلليارد تەڭگە جۇمسايتىنبىز. ءقازىر 21 مىڭ ادال ەمەس قارىز الۋشى بار. 19،5 مىڭ ادامعا قارىز تولەۋ جەڭىلدەتىلدى"، - دەيدى نازاربايەۆ.  ق ر ۇلتتىق بانك باسشىسى دانيار اقىشيەۆ وسى ماسەلەگە قاتىستى ءوز ويىن ايتتى.  "نۇرسۇلتان ءابىش ۇلى، بۇل ماسەلە بويىنشا ەكى پىكىر بار. ءبىرىنشىسى - كومەكتەسۋ كەرەك. ەكىنشىسى - كومەكتەسۋ ارقىلى ماسىلدىققا ۇيرەتەمىز"، - دەيدى ول.  "نەگىزى كرەديت تولەمەۋ بۇل قىلمىستىق جاۋاپكەرشىلىككە اكەلەدى. بىزدە مۇنى ەشكىم تۇسىنبەيدى. تولەي الماساڭ، كرەديت الما. الدىڭ با، قايتارۋ كەرەك. اركىم ءوز ىسىنە جاۋاپتى بولۋ كەرەك. ەشكىم يپوتەكالىق كرەديت ال دەپ زورلاعان جوق. مەملەكەتكە قارجى قۇياتىن سالا جەتەرلىك، وسى حالىق ءۇشىن، ەكونوميكانى دامىتۋعا، يندۋسترياليزاسياعا. سوندىقتان مۇنى قاتاڭداتۋ قاجەت، تەكسەرۋ كەرەك. ەكىنشى دەڭگەيلى بانكتەر، ادامداردى ماسىلدىق ادەتىنەن ارىلتىڭدار. ۇكىمەتكە دە وسى تاپسىرما"، - دەدى ەلباسى.