12 ساۋىردە قازاقستان رەسپۋبليكاسىنىڭ ەنەرگەتيكا ءمينيسترى قانات بوزىمبايەۆ شىمكەنت مۇناي وڭدەۋ زاۋىتىنا جۇمىس ساپارىمەن كەلدى. مينيستر شىمكەنت مۇناي وڭدەۋ زاۋىتىن جاڭعىرتۋ جوباسىنىڭ ءبىرىنشى كەزەڭىنىڭ نىساندارىن، سونداي-اق ەكىنشى كەزەڭى نىساندارىنىڭ قۇرىلىس الاڭدارىن كورىپ، ارالاپ شىقتى دەپ حابارلايدى "قامشى" اقپاراتتىق اگەنتتىگى ق ر ەنەرگەتيكا مينيسترلىگى مەن «قمگ-وم» اق باسپا ءسوز قىزمەتىنە سىلتەمە جاساپ.

«قازمۇنايگاز» اق-نىڭ باسشىلىعى مينيسترگە جوبانىڭ ءبىرىنشى كەزەڭى بويىنشا جۇمىستاردىڭ مەحانيكالىق اياقتالعانى جانە ەكىنشى كەزەڭ نىساندارىندا قۇرىلىس-مونتاجداۋ جۇمىستارىن جۇرگىزۋ كەستەسى تۋرالى باياندادى.

زاۋىتتى ارالاپ شىققاننان كەيىن ق. بوزىمبايەۆ جاڭعىرتۋ جوباسىن تەزىراق اياقتاپ، قازاقستان ءۇشىن جوعارى كلاستى اۆتوموبيل وتىنىنىڭ قاجەتتى كولەمىن الۋ ءۇشىن جۇمىستاردى قارقىندى جۇرگىزۋدىڭ ماڭىزدىلىعىن اتاپ ءوتتى.

ەستەرىڭىزگە سالا كەتسەك، 31 ناۋرىزدا شىمكەنت مۇناي وڭدەۋ زاۋىتىندا زاۋىتتى جاڭعىرتۋ جوباسىنىڭ ءبىرىنشى كەزەڭىنىڭ ءىرى تەحنولوگيالىق نىسانى بولىپ تابىلاتىن – شيكىزاتتى الدىن الا گيدروتازالايتىن بلوگى بار جەڭىل بەنزين فراكسيالارىن يزومەرلەۋ قوندىرعىسىندا قۇرىلىس-مونتاجداۋ جۇمىستارىنىڭ مەحانيكالىق اياقتالعانى تۋرالى اكتىگە قول قويىلعان بولاتىن.

قازىرگى ۋاقىتتا، اتالعان نىساندا ىسكە قوسۋ-رەتتەۋ جۇمىستارى جۇرگىزىلىپ جاتىر جانە ول جۇمىستاردى اعىمداعى جىلدىڭ شىلدەسىنە اياقتاۋ جوسپارلانعان. نىسان ىسكە قوسىلعاننان كەيىن كەپىلدى پايدالانۋ كورسەتكىشتەرىنە قول جەتكىزىلىپ، 2017 جىلى ك4، ك5 ەكولوگيالىق كلاستاعى (ەۆرو-4، ەۆرو-5 انالوگى) جوعارى وكتاندى بەنزيندەر مەن ديزەل وتىنى الىناتىن بولادى جانە جوعارى وكتاندى بەنزيندەردى ءوندىرۋ جىلىنا 460 مىڭ تونناعا، ديزەل وتىنىن ءوندىرۋ جىلىنا 226 مىڭ تونناعا، اۆياوتىندى ءوندىرۋ جىلىنا 27 مىڭ تونناعا ارتاتىن بولادى.  

بۇعان قوسا، شىمكەنت مۇناي وڭدەۋ زاۋىتىندا جاڭعىرتۋ جوباسىنىڭ ەكىنشى كەزەڭىنىڭ اياسىنداعى جۇمىستار دا قارقىندى جۇرگىزىلۋدە. جوبانىڭ ەكىنشى كەزەڭى زاۋىتتىڭ شيكىزات وڭدەۋ قۋاتىن جىلىنا 5،25 ملن. توننادان 6 ملن. تونناعا دەيىن ارتتىرۋعا جانە شيكىزاتتى وڭدەۋ تەرەڭدىگىن جوعارىلاتۋعا باعىتتالعان. جوبانىڭ ەكىنشى كەزەڭى تەحنولوگيالىق تۇرعىدان كۇردەلى بولىپ كەلەدى جانە جوعارى وكتاندى موتورلى وتىنداردى الاتىن، قۋاتى جىلىنا 2،0 ملن. توننا مۇنايدى تەرەڭ وڭدەيتىن كاتاليتيكالىق كرەكينگ قوندىرعىسى كەشەنىن سالۋدى قاراستىرادى.

جوبانىڭ ەكىنشى كەزەڭى اياقتالعاندا زاۋىتتا جوعارى وكتاندى بەنزيندەردى ءوندىرۋ جىلىنا 2 270 مىڭ تونناعا دەيىن، ديزەل وتىنىن ءوندىرۋ جىلىنا 1 916 مىڭ تونناعا دەيىن، اۆياوتىندى ءوندىرۋ جىلىنا 400 مىڭ تونناعا دەيىن، ال زاۋىت ونىمدەرىنىڭ ق ر نارىعىنداعى ۇلەسى 35%-عا دەيىن ارتاتىن بولادى.

جالپى شىمكەنت مۇناي وڭدەۋ زاۋىتىن جاڭعىرتۋ جوباسى بويىنشا 11 تەحنولوگيالىق قوندىرعىلاردى جانە جالپى زاۋىت شارۋاشىلىعىنىڭ 29 نىسانىن سالۋ جانە رەكونسترۋكسيالاۋ قاراستىرىلعان.

جوبا بويىنشا باس مەردىگەر جۇمىستارىن مۇنايگاز ونەركاسىبى سالاسىندا ينجينيرينگتىك جانە قۇرىلىس جۇمىستارىمەن اينالىساتىن ءىرى كومپانيالاردىڭ ءبىرى – سرەسس (China Petroleum Engineering & Construction Corporation) كومپانياسى ورىنداۋدا.

جۇمىس ساپارىنىڭ ناتيجەسى بويىنشا ەنەرگەتيكا ءمينيسترى ق. بوزىمبايەۆ شىمكەنت مۇناي وڭدەۋ زاۋىتىنىڭ باسشىلىعىنا جاڭعىرتۋ جوباسى بويىنشا ءارى قاراي جۇرگىزىلەتىن جۇمىستارعا قاتىستى ءبىرقاتار تاپسىرمالار بەردى.