بۇگىن، 14 ساۋىردە «كسەلل» كومپانياسى موبايل ءبىلىم بەرۋ جونىندەگى «Digital Life» اۋقىمدى جوباسىن ىسكە اسىرۋدىڭ ەكىنشى جىلىنىڭ قورىتىندىسىن جاريالادى، دەپ حابارلايدى قامشى اقپاراتتىق اگەنتتىگى. ەكى جىل ىشىندە وعان قازاقستاننىڭ 16 قالاسىنان بارلىعى 6،2 مىڭنان استام ادام قاتىستى. موبيلدىك مەديا، موبيلدىك قاۋىپسىزدىك، موبيلدىك ءبىلىم بەرۋ، موبيلدىك مەملەكەت، موبيلدىك بيزنەس جانە باسقا دا تاقىرىپتار بويىنشا 230 تەگىن ماستەر-كلاسس وتكىزىلدى.

«كسەلل» ۇيىمداستىرعان «Digital Life» موبيلدىك ءبىلىم بەرۋ جونىندەگى شەبەرلىك ساباقتارىنا 6 مىڭنان استام قازاقستاندىق قاتىستى.

«Digital Life» جوباسى ۇيىمداستىرۋشىلارىنىڭ مىندەتى قازاقستاندىقتاردىڭ سمارتفوندار مەن ءموبيلدى قوسىمشالاردىڭ مۇمكىندىكتەرى مەن ارتىقشىلىقتارى تۋرالى ءبىلىمىن ارتتىرۋ بولدى. ماستەر-كلاسس تىڭداۋشىلارى – مەكتەپ وقۋشىلارى مەن اتا-انالار، ستۋدەنتتەر، شاعىن جانە ورتا بيزنەس وكىلدەرى، جۋرناليستەر مەن بلوگەرلەر.

«بارشاعا ارنالعان ءبىلىم» - «كسەلل» كومپانياسىنىڭ الەۋمەتتىك جوبالاردى ىسكە اسىرۋداعى نەگىزگى ۇستانىمى. بۇل ءبىزدىڭ بارلىق نيەت بىلدىرۋشىلەرگە ءوزىن-وزى دامىتۋ مەن ءبىلىم الۋعا مۇمكىندىك بەرەتىن قۇرالدار مەن ءموبيلدى تەحنولوگيالاردى ۇسىناتىنىمىزدى بىلدىرەدى. ءبىزدىڭ ءموبيلدى ءبىلىم بەرۋ جونىندەگى كۋرستارىمىز بۇل ماقساتقا تولىق ساي كەلەدى. ولارعا كەز كەلگەن ادام قاتىسا الادى، كۋرستار تەگىن جانە قازاقستاننىڭ بارلىق ءىرى قالالارىندا وتەدى. ءبىز قازاقستاندىقتار ءبىلىم الۋ، كاسىپ جۇرگىزۋ، دەنساۋلىقتى نىعايتۋ جانە جاي عانا قارىم-قاتىناس جاساۋ ءۇشىن ءوز سمارتفوندارىنىڭ بار الەۋەتىن پايدالانسا ەكەن دەيمىز. ءبىز ايتارلىقتاي شامادا مۇنى ىسكە اسىرا الدىق دەپ ويلايمىن»، دەپ اتاپ ءوتتى «كسەلل» اق كوممۋنيكاسيالار ءبولىمىنىڭ جەتەكشىسى ناتاليا ەسكوۆا.

سونىمەن بىرگە زەينەتكەرلەر ءۇشىن «اپاشكي، اتاشكي ي سمارتفون» اتتى كۋرس ارنايى ۇيىمداستىرىلدى، وعان قاتىسۋشىلار سمارتفون قولدانۋدى، مەسسەندجەر ورناتۋدى جانە الەۋمەتتىك جەلىلەردە اڭگىمەلەسۋدى ۇيرەنگەن.

 «ينتەرنەت-ومىرگە بەلسەنە ارالاسۋدى بۇرىننان قالايتىنمىن. ماعان جاڭالىقتار، كىتاپتار، فيلمدەر مەن مۋزىكانىڭ ءبارىن ينتەرنەتتەن تابۋعا بولاتىنىن ايتتى. مەنىڭ بۇكىل الەم بويىنشا دوستارىم كوپ، ءبىراق ولارمەن ۇنەمى بايلانىس جاساپ تۇرۋ مۇمكىن بولا بەرمەيدى. سودان ۇلىم سمارتفون سىيلادى. سمارتفوننىڭ قولدانۋشىعا ارنالعان كىتاپشاسىن وقىپ شىقتىم، ءبىراق شىنىمدى ايتسام، تۇك تۇسىنبەدىم. ال ءقازىر – ترەنينگ كەزىندە WhatsApp پەن Youtubeء-تى قالاي قولدانۋدى، ينتەرنەتكە قالاي قوسىلۋ كەرەكتىگىن، الەمنىڭ باسقا ءبىر تۇكپىرىندەگى ادامدى قالاي تابۋعا بولاتىنىن ءتۇسىندىم. قازىرگى دۇنيەنى تانۋ، نەمەرەلەرىم ايتقانداي، «بايىبىن ءبىلۋ» - بۇل وتە قىزىق، ءارى تارتىمدى»، - دەيدى «اپاشكي، اتاشكي ي سمارتفون» كۋرسىن تىڭداۋشىلارىنىڭ ءبىرى الەكساندر فرولەنكوۆ.

قامشىگەر: گۇلىم جاقان