تۇركيا پرەزيدەنتى رەجەپ تايىپ ەردوعان جاقىن ۋاقىتتا ءولىم جازاسى جايىندا ماسەلەنى قايتا كوتەرەتىنىن مالىمدەدى، دەپ جازادى قامشى اقپاراتتىق اگەنتتىگى.

تۇرىك كوشباسشىسى بۇل جايىندا ىستامبۇلداعى رەزيدەنسياسى الدىنا جينالعان حالىقتىڭ الدىندا ۋادە ەتتى.

ىستامبۇلدا وزىنە قوشەمەت بىلدىرگەن حالىق الدىندا ءسوز سويلەگەن ەردوعان پرەمەر-مينيستر بينالي يىلدىرىممەن جانە ۇلتشىل وپپوزيسيا كوشباسشىسىمەن ءولىم جازاسىن قايتارۋ ماسەلەسىن «دەرەۋ» تالقىلايتىنىن ءمالىم ەتتى.

اتاپ وتىلگەندەي، مۇنداي قادام تۇركيانىڭ ەۋروپالىق وداققا ەنۋ تۋرالى كەلىسسوزدەرىنىڭ وڭ ناتيجەسىز قالاتىنىن بىلدىرەر ەدى. جەكسەنبى، 16 ءساۋىر كۇنى وتكەن رەفەرەندۋمدا تۇركيا كونستيتۋسياسىنىڭ 18 بابىنا وزگەرىستەر ەنگىزۋ قاجەت پە دەگەن ماسەلە قارالدى.

 حالىق وزگەرىستەردى قۇپتاعان جاعدايدا پرەمەر-مينيستردىڭ قىزمەتى قىسقارىپ،  پرەزيدەنت ۆيسە-پرەزيدەنتتەر مەن مينيسترلەردى، جوعارى لاۋازىمدى شەنەۋنىكتەردى ءوز ەركىمەن تاعايىنداي الادى. ودان بولەك، پرەزيدەنت توتەنشە جاعداي جاريالاۋ جانە پارلامەنتتىڭ باسىم داۋسىمەن عانا كۇشى جويىلاتىن جارلىقتاردى شىعارۋ قۇقىعىنا يە بولادى. رەسمي دەرەكتەرگە سايكەس، بيۋللەتەندەردىڭ 98 پايىزىن وڭدەۋ قورىتىندىسى بويىنشا، داۋىس بەرۋشىلەردىڭ 51،3 پايىزى وزگەرىستەردى ەنگىزۋدى قۇپتاعان، ال 48،59 پايىزى قارسى داۋىس بەرگەن.