«اdidas» تانىمال برەندىندەگى ءۇش اق جولاق ەكىنشى دۇنيەجۇزىلىك سوعىستان كەيىن پايدا بولعان كورىنەدى. سول كەزدە اياق كيىمدەرگە تەرىدەن جولاقتار قالدىرۋ بۇيىمنىڭ ساپالى ەكەنىنىڭ كورسەتكىشى بولعان. وسى ورايدا، ادولف داسسلەر(«اdidas» نەگىزىن قالاۋشى) ءوز تاۋارىنىڭ وزگەلەردەن الىستان ايقىنداپ تۇراتىن بەلگىسى بولعانىن قالادى. وسىلايشا، ءوز تاۋارلارىنداعى تەرى جولاقتاردى اققا بوياپ تاستايدى. «اdidas»-تاعى ءۇش اق جولاقتىڭ پايدا بولۋ تاريحى وسىنداي.

الايدا، بۇل يدەيا ب.ز. ح عاسىرىندا-اق وزگە بىرەۋدىڭ ويلاپ تاۋىپ قويعان يدەياسى بولىپ شىقتى. وعان دالەل، بىلتىر موڭعوليا جەرىنەن تابىلعان ايەل مۋمياسى دەپ حابارلايدى قامشى اقپاراتتىق اگەنتتىگى.

ارحەولوگتاردى مۋميانىڭ مىڭ جارىم جىلداي بۇزىلماي ساقتالۋى عانا ەمەس،  اياعىنداعى ءۇش جولاقتى برەند اياق كيىمى تاڭعالدىرعان. جورامالدار كوپ بولدى، عاجاپ قۇبىلىستارعا سەنەتىندەر ايەلدىڭ زامان اراسىندا ەركىن اۋىسىپ جۇرە الاتىن قاسيەتى بار بولۋى كەرەك دەگەن پىكىرلەردى دە ايتتى. الايدا، ءبىر جىلعا جۋىق جۇرگىزىلگەن زەرتتەۋلەر ناتيجەسىندە، عالىمدار ءبىرقاتار قورىتىندىعا كەلدى: «ايەلدىڭ جاسى شامامەن 30-40 جاستا. باس سۇيەگىنەن جاراقاتتار تابىلۋىنا بايلانىستى، باسىنان سوققى الىپ قايتىس بولعانىن اڭعارۋعا بولادى. الايدا، بۇل وقىس بولعان وقيعا ما، الدە شىنىمەن وزگەلەر تاراپىنان سوققى العان با ونى انىقتاي المايمىز»، - دەيدى موڭعوليا مادەني مۇرالار ورتالىعىنىڭ ديرەكتورى گالبادراح ەنحبات. ارحەولوگتاردىڭ زەرتتەۋىنشە، ايەل جوعارى ستاتۋستاعى حانشايىم نەمەسە پاتشايىم ەمەس. ويتكەنى، كونە زاماندا لاۋازىمدى ادامداردى التىن-كۇمىستەرىمەن بىرگە كومگەن. ال تابىلعان مۋميا-ايەل قاراپايىم تىگىنشى بولعان. بۇل جورامالعا نەگىز بولاتىنى - بىرگە كومىلگەن زاتتارى تىگۋ قۇرالدارى ەكەنى. سونىمەن قاتار، ساپالى ءارى ءساندى كيىم قالدىقتارى. اياق كيىمنىڭ ساقتالۋى دا سول كەزدەگى ساپانىڭ مىقتى بولعانىن دالەلدەپ وتىر. اياق كيىم تىزەگە دەيىن كەلەدى، مۇقيات ساندەلگەن، ساپالى، بەرىك تەرىدەن تىگىلگەن ەكەن.

«اdidas» كروسسوۆكيىن كيگەن مۋميا قازىرگى تاڭدا موڭعوليا ۇلتتىق مۇراجايىنا تاپسىرىلعان.