تازالىق دەگەن كەزدە ادام بالاسىنىڭ ويىنا ءبىرىنشى رەتتە سىرتقى تازالىق ورالادى. وسىعان بايلانىستى پايعامبارىمىز دا مۇسىلمانداردى ءوزىنىڭ جەكە باسى، ءۇيى، ءتىپتى قورشاعان ورتانىڭ دا تازالىعىنا ءمان بەرۋگە شاقىرادى. يسلام دىنىندە جەكە باستىڭ تازالىعىنا قاتىستى وتە كوپ ۇكىمدەر ايتىلعان. سول ءۇشىن دارەت الۋدى، عۇسىل قۇيىنۋدى ءامىر ەتەدى.
سونداي-اق پايعامبارىمىز عۇسىل قۇيىنۋعا ەشقانداي سەبەپ بولماعان جاعدايدا دا مۇسىلماننىڭ اپتادا جوق دەگەندە ءبىر مارتە جۋىنۋىن بۇيىرعان: «جۇما كۇنى جۋىنۋ باليعات جاسىنا كىرگەن ءاربىر ازامات ءۇشىن سۇننەت»، «جۇما نامازىنا كەلگەندەر جۋىنىپ كەلسىن» دەگەن حاديستەرىمەن دەنەنىڭ تازالىعىنا ءمان بەرۋدى وسيەت ەتەدى. دارەت بۇزىلماعان جاعدايدا سول دارەتپەن كەلەسى نامازدى وقۋعا رۇقسات بار بولا تۇرا، پايعامبارىمىز ءاربىر نامازدى جاڭا دارەتپەن وقىعان. دارەت الۋ بارىسىندا اسىقپاي، دارەت مۇشەلەرىن تولىق جۋۋدى ەسكەرتكەن. حاديستەرى ارقىلى ادام بالاسىنىڭ دارەت العان سايىن سول دارەت مۇشەلەرىمەن جاساعان كۇنالارىنىڭ كەشىرىلەتىن بىلدىرگەن. ال اقىرەت كۇنى ۇمبەتىنىڭ دارەت مۇشەلەرىنىڭ جارقىراپ، باسقا ۇمبەتتەردەن ەرەكشەلەنىپ تۇراتىنىن ايتادى.
ۇيقىدان ويانعاندا ەڭ ءبىرىنشى قولدى جۋۋدى ءامىر ەتىپ، بىلاي دەيدى: «تۇندە قولدارىڭدى قايدا جۇگىرتكەندەرىڭدى بىلمەيسىڭدەر». تاماقتان بۇرىن جانە كەيىن قول جۋۋمەن قاتار، ءسۇت سەكىلدى مايلى نارسەلەردى ىشىپ-جەگەندە دە اۋىزدىڭ شايىلۋى كەرەكتىگىن ايتادى. اسىرەسە ۇيىقتار كەزدە قولدىڭ تازا بولۋىن جانە دارەتپەن جاتۋدى، وسىلايشا جاتار الدىندا دارەت مۇشەلەرىنىڭ، سونىڭ ىشىندە اياقتاردىڭ دا جۋىلۋىنا ءمان بەرەدى. ال جاتقان كەزدە قولىن جۋماي، ماي ءيىستى قولىمەن جاتا سالعان ادامعا ارناپ: «قولىنداعى تاماق يىسىمەن ۇيىقتاعان ادام قانداي دا ءبىر اۋرۋعا شالدىقسا، كىنانى وزىنەن عانا كورسىن»،- دەيدى.
