اتىراۋ وبلىسىنداعى اققىستاۋ اۋلىنىڭ تۇرعىنى ساعىنعالي قاريا وبلىس اكىمى نۇرلان نوعايەۆقا “كرىشاسى” بار براكونەرلەردىڭ كوپ ەكەنىن ايتىپ، زاڭسىزدىقتان اراشا سۇرادى. بۇل تۋرالى بۇگىن يساتاي اۋدانىندا وتكەن “نۇر وتان”  پارتياسى اۋداندىق فيليالىنىڭ كەزەكتەن تىس كونفەرەنسياسىندا بەلگىلى بولدى.

“...براكونەرگە مەن دە قارسىمىن. ءقازىر ءۇش براكونەردىڭ ەكەۋىنىڭ كرىشاسى بار. ۇستايدى، كرىشاسى باردى قويا بەرەدى. ءۇش ماشينە وتەدى، ەكەۋىن ۇستايدى، بىرەۋىن قويا بەرەدى. ەندى مۇنداي ادىلەتسىزدىكتى كورىپ تۇرعاندا حالىق ۋشىعادى عوي”، – دەدى ول وبلىس اكىمىنە.

“مەن رەسمي تۇردە ايتامىن. ءبىز بۇل جولدان قايتپايمىز. ...ەشكىم بالىق اۋلاماسىن دەمەيدى. اۋلايىق، ءبىراق جابايىلىقپەن اۋلامايىق. شامالى مۇمكىندىك بەرەيىك. بالىق ءوسسىن، ءبىز رەتىمەن عانا شەتىنەن الىپ وتىرايىق”، - دەدى وبلىس اكىمى براكونەرلەرمەن كۇرەستىڭ كۇشەيەتىنىن ءبىلدىرىپ.

نۇرلان نوعايەۆ سوعىستان كەيىن ازايىپ قالعان بالىقتىڭ 60-شى جىلدارى قالاي كوبەيگەنىن دە ەسىنە الدى.

“سوعىس كەزىندە بالىقتىڭ ءبارىن مايدانعا جىبەرگەن. سوعىس بىتكەن سوڭ 1945-65 جىلدارى بالىق اۋلاۋدى ۋاقىتشا توقتاتقان. (سونىڭ ارقاسىندا – رەد.) 65ء-شى جىلدان كەيىن بالىق قاپتاعان. كەيىن رۇقسات بەرگەن. بۇگىن سول كۇن قايتا ورالىپ وتىر، بالىق تاعى جوق”، - دەدى ول.

ايتا كەتەلىك، بالىق ۋىلدىرىق شاشاتىن مەزگىلدە سۋ كولىگىن جۇرگىزۋ ەرەجەسىنە نارازى بولعان ءبىر توپ اتىراۋلىق ساۋىردە بيلىك وكىلدەرىمەن قاقتىعىسقان ەدى. سەبەبى، بالىق قورعاۋمەن اينالىساتىن ينسپەكسيا سۋ جانۋارىنىڭ كوبەيۋىنە كەدەرگى بولماۋ ءۇشىن موتورىنىڭ قۋاتى 20 اتتىڭ كۇشىنەن اساتىن قايىقتاردى تەڭىزگە شىعارماي قويعان. كەيىن نارازىلىق تانىتقان 37 ادامنىڭ تۇراقتى جۇمىسقا ورنالاسۋعا كەلىسكەنى بەلگىلى بولدى.

بىرنەشە كۇن وتكەن سوڭ زاڭسىز اۋلانعان 4 توننا بالىقتىڭ رەسەيگە ءوتىپ كەتكەنى انىقتالىپ، كوپ ۇزاماي جەرگىلىكتى ورمان شارۋاشىلىعى جانە جانۋارلار دۇنيەسى اۋماقتاق ينسپەكسياسىنىڭ باسشىسى مۇرات ەرمەكقالي ءوز ەركىمەن جۇمىسىنان كەتۋ تۋرالى ارىز جازدى.