وتكەن اپتادا، قازاننىڭ 9-ى استانا قالاسىندا «ءبىر ماقسات، ءبىر مۇددە، ءبىر بولاشاق!» اتتى حالىقارالىق ونەر فەستيۆالى ءوتتى. فەستيۆالگە قاتىسىپ، جۇلدەگەرلەر قاتارىنان كورىنگەن جاس اقىن مارعۇلان اقانمەن وربىگەن «قامشى» پورتالىنىڭ ەكسكليۋزيۆتى سۇحباتىن نازارلارىڭىزعا ۇسىنامىز:
- مارعۇلان جۇلدەڭمەن قۇتتىقتايمىن. ونەر فەستيۆالى قالاي ءوتتى؟
- راحمەت. بۇل جولعى الامانعا جۇڭگو، موڭعوليا، قىرعىزستان، وزبەكستان، تاجىكستان، ارابيا، تۇركيا، گەرمانيا، تاعى باسقا ەۋروپا ەلدەرىن، جيىنى جيىرما ەلدەن 80 ونەرپاز ءمۇشايرا، ءداستۇرلى ءان، سۋرەت كورمە باعىتى بويىنشا قاتىستى. ولار ون سەگىز بەن وتىز بەستىڭ اراسىنداعى جاستار. شەتەلدەگى قازاقتاردىڭ ونەر فەستيۆالىنە توپتاسۋى ۇلتتىڭ ۇيىسۋىنىڭ ءبىر كورىنىسى ەدى. ۇيىمداستىرۋشى ق ر مادەنيەت جانە سپورت مينيسترلىگى، تىلدەردى دامىتۋ جانە قوعامدىق-ساياسي جۇمىس كوميتەتىنە كوپ العىس بىلدىرەمىز. فەستيۆال اياسىندا استانانىڭ اسەم جەرلەرىن ارالاپ، ۇلتتىق مۋزەيدى تاماشالاۋعا مۇمكىندىك الدىق. ونەر باسەكەسىنە وزگە ەلدىڭ اتىنان قاتىسقان ونەرپازداردىڭ باسىپ كوپشىلىگى قازاقستاندا تۇراتىندار ەدى. فەستيۆال ماقساتى شەتەلدەگى قانداستارىمىزدىڭ تانىلماعان تالانتتارىن حالىققا جاريالاۋ بولىپ تابىلادى. موڭعوليا رەسپۋبليكاسىنان كەلگەن وزگەرىس اتتى باۋىرىمىز تالايدى ءتانتى ەتتى. ءداستۇرلى ءاننىڭ باس جۇلدەسىن جەڭىپ العان بۇل جىگىت «باس» داۋىسىمەن ءان ايتادى ەكەن. ول بۇنداي داۋىسقا يە قازاقستان بويىنشا ءۇشىنشى ادام عانا بولىپ وتىر. وزگەرىستى بولاشاقتا ۇلكەن ساحنادان كورەمىز دەپ سەنەمىن. بۇعان دەيىن مەن قاتىسقان باسەكەلەردىڭ ىشىندە مەنى تاڭ قالدىرعان دا، ەڭ ءادىل وتكەن دە وسى دودا بولدى. پوەزياعا ءۇش جۇلدەلى ورىن جانە ەكى ىنتالاندىرۋ جۇلدەسى تاعايىندالعان. ءداستۇرلى انگە ءتىپتى تورەشىلەر ءوز قالتالارىنان تەڭگە شىعارىپ جۇلدەلەر سانىن ارتتىرىپ جاتتى.
- ءسىز قايسى ەلدىڭ اتىنان ونەر تالاستىردىڭىز؟ فەستيۆالدە باعىڭىزدى قانداي ولەڭ اشتى؟
- مەن جۇڭگو قازاقتارىنىڭ اتىنان قاتىستىم. التاي ايماعىنىڭ كوكتوعاي دەگەن جەرىندە دۇنيەگە كەلگەنمىن. بۇل جەر تۋ كوتەرىپ، ەلىن قورعاۋ ءۇشىن تۇلپار مىنگەن وسپان باتىردىڭ تۋعان توپىراعى. اكەم دە، مەن دە قىتايدا دۇنيەگە كەلگەنىمىزبەن ارعى التى اتام اياكوزدە تۋعان. اتام توعىز جاسىندا تۋعان جەردىڭ توپىراعىمەن قوشتاسىپ شەتەل اسىپتى، مەن توعىز جاسىمدا اتاجۇرتقا ورالدىم. بۇلدا بولسا ۋاقىتتىڭ توعىسۋى دەپ ويلايمىن. فەستيۆال شارتى بويىنشا، بىزگە قازاقستان جايىندا ءبىر ولەڭ، اتاجۇرت تۋرالى جانە ەركىن تاقىرىپقا ءبىر ولەڭ وقۋ تاپسىرىلدى. مەن ءوز كەزەگىمدە «شەكاراداعى شەر» دەگەن ولەڭىمدى وقىدىم. ءمۇشايراعا نەسىپبەك ايت ۇلى تورەلىك ەتتى. باس جۇلدەنى قىتايدان كەلگەن ەركىن يساحان الدى. ءۇشىنشى ورىندى قانجىعاما بايلاپ قايتتىم. فەستيۆال ماعان ۇلكەن شابىت سىيلادى.
اڭگىمەلەسكەن: بىرلەسبەك ءساياۇل
مارعۇلان اقان. شەكاراداعى شەر
پاڭ دالا،
دارمەن بەرشى پاقىرىڭا،
تاعدىردىڭ سالىپ قويما تاقىمىنا.
جارىق كۇن جارىعىڭمەن جارىلقا ءبىر،
مامىق ءتۇن جول كورسەتشى اقىنىڭا.
ارتقانى جۇرتتىڭ جۇگى جاۋىرىنا،
اقىنمىن... قارعىس ايتپاس جاۋ ۇلىنا.
شەكارا، شەكتەي كورمە شەرىمدى سەن،
جەتكىزشى الاتاۋدىڭ باۋىرىنا!
اپارشى ۇلى ابايدىڭ اۋىلىنا!
كوڭىلىم قۇلازىما مارقاي دەسەم،
تۇر الدا ارقا-اكەم، التاي-شەشەم.
باستاۋدان ءزام-زامىڭدى كۇن تۋار ما،
قايمىقپاي قانىپ ىشەر جارتى اي كەسەم.
جوتاڭا كوزىم ءتۇسىپ تەبىرەندى،
ءار الۋان شاشىراتىپ كوك رەڭدى.
الدىنا قاراپ ۇلىڭ ارمان كەشىپ،
ارتىندا جۇرتقا قاراپ كۇڭىرەندى.
كىندىگىم جۇرتقا قالدى قانىن كومىپ،
اسىقتىم! قالماسىن دەپ ارىم دا ءولىپ.
وتانعا وتتى جەبە سەكىلدەنىپ،
اتىلدىم ادىرنادان جانىمدى ءورىپ.
دۇنيە بىلمەپپىن-اۋ تارلىعىڭدى.
تۋعان جەر، تابالاما تاعدىرىمدى،
كۇش بولسا تاۋ-تاسىڭمەن تولاعايداي،
كوشىرىپ اكەتەر ەم بارلىعىڭدى.
و،اكە قاراشى انە پاڭ دالانى،
كورگەن كوز سۇلۋلىققا تاڭ قالادى.
رۋحىمىز ولمەسىنشى... اناۋ شاپقان،
تۇلپاردان بىزگە جەتكەن شاڭ باعالى.
قايعىنى - قۋانىشتى ۇلتپەن كەشىپ،
ورالۋ ماڭدايىما بىتكەن نەسىپ.
جەتپەگەن جەتەگىڭە جۇرتتىڭ جاسى،
كەلەدى ساعان اۋا بۇلتپەن كوشىپ.
شۇكىر-اق! قۇداي بەردى قالاۋىمدى،
تيگىزدىم جەرگە جىلى تابانىمدى.
كوش جەتىپ كەرۋەنگە ۇرگەن قارا كۇشىك،
قارسى الدى تىستەپ تۇرىپ بالاعىمدى...
تىستەشى، تىستەي ءتۇسشى سەزىنەيىن،
تالقىسىپ توپىراقتا كوز ىلەيىن.
اتامىزدىڭ شەكپەنىن جۇرتتا قالعان،
ءبىر يىسكەپ قۇشاعىڭدا ەزىلەيىن.
