بريتاندىق پول حەيمەن وزگەنىڭ جۇرەگىمەن ەڭ ۇزاق ءومىر ءسۇرىپ جاتقان ادام رەتىندە گيننەستىڭ رەكوردتار كىتابىنا ەنگىسى كەلەدى. 1987 جىلى 19 جاستاعى حەيمەن بريتانيادا العاشقىلاردىڭ ءبىرى بولىپ ترانسپلانتاسيا بويىنشا وپەراسيا جاساتتى. ول ۋاقىتتا ادام اعزاسىن اۋىستىرۋ قازىرگىدەي وڭاي بولماعان.

15 جاسىندا پولدىڭ كارديومەگاليا اۋرۋىنا شالدىققانى بەلگىلى بولادى. ول دەنە شىنىقتىرۋ ساباعىندا تالىپ قالعاننان كەيىن اتالمىش دەرتتىڭ بار ەكەنى انىقتالعان. بىرنەشە جىلدان كەيىن ول جۇرەك اۋىستىرۋعا كەزەككە تۇردى.

جاڭا جۇرەك سالىنعاننان كەيىن دارىگەرلەر پول تەك ون جىل عانا ءومىر سۇرەدى دەپ بولجادى. الايدا پول بارلىق بولجامدى جوققا شىعاردى. ءقازىر ونىڭ جاسى 49-دا. پول حەيمەن ءوزىن جاقسى سەزىنەتىنىن ايتادى. ول ارتىق ۋايىمداماۋعا تىرىسادى.  دارىگەرلەر وعان فۋتبول ماچتارىن دا كورۋگە تىيىم سالعان.  

«جاڭا جۇرەك ماعان بەرىلگەن ەڭ ۇلكەن سىي. مەنىڭ جولىم بولدى. ءالى دە ءتىرى ەكەنىمدى، ءالى دە جەر باسىپ جۇرگەنىمدى سەزىنۋ مەن ءۇشىن باقىت» دەيدى پول.

ەڭ قىزىعى، بريتاندىق ەر ادام  جۇرەك قانا ەمەس، بۇيرەگىن دە اۋىستىرعان ەكەن. ول بۇل وپەراسيانى جاڭا جۇرەگىمەن جاساتقان. دارىگەرلەر ۇلكەن قاۋىپكە قاراماستان پولعا وپەراسيا جاسادى. پول حايمەن سەكىلدى ەمدەلۋشىلەرگە وتا جاساۋ بۇل  ءقاۋىپتى ەكى ەسەگە ارتتىرعان ەدى.

ەكى كۇردەلى وپەراسيا ەر ادامنىڭ جەكە ومىرىنە ەشقانداي كەدەرگىسىن كەلتىرمەدى. پول حايمەن ۇيلەندى. ونىڭ ەكى قىزى بار. ۇلكەنى اكەسىنە قاراپ، مەديسينانىڭ جەتىستىكتەرىنە تاڭقالىپ، ءوزى دە دارىگەر بولۋدى شەشتى. ول ءقازىر مەديسينالىق ۋنيۆەرسيتەتتە وقيدى.

«مەن قىزدارىمنىڭ قالاي ءوسىپ كەلە جاتقانىن كورەمىن دەپ ويلامادىم. جىلدار زىرعىپ ءوتىپ جاتقانىنا قاراماستان ءوزىمدى جاقسى سەزىنەمىن» دەيدى پول.

ول ءومىر بويى ەلەكتريك بولىپ جۇمىس ىستەگەن. ايەلىمەن اجىراسقاننان كەيىن اتا-اناسىنىڭ ۇيىندە تۇرىپ جاتىر. وزگەنىڭ جۇرەگىمەن ەڭ ۇزاق ءومىر ءسۇرىپ، گيننەستىڭ رەكوردتار كىتابىنا كىرگەن 73 جاستاعى دجون ماككافەرتي قايتىس بولدى. ول جاڭا جۇرەكپەن 33 جىل ءومىر سۇرگەن. الايدا دارىگەرلەر پولعا ايتقانداي  وعان دا 10 جىل عانا ءومىر سۇرەدى دەپ بولجاعان.

شولۋشى: اسەم المۇحانبەت