كەيدە بىزدەر تۇسىنبەيمىز ايەلدى،
ايەل - انا تەربەتەتىن الەمدى.
جۇدىرىقتاي جۇرەكپەنەن سۇيمەسەك،
جۇدىرىققا بولماس ولار تاۋەلدى.
ءبىز ەركەكتەر كوپ نارسەنى قالايمىز،
ءوزىمىزدى حاننان ارتىق سانايمىز.
ءۇيىمىزدى جارىق قىلىپ تۇراتىن،
كۇنىمىزگە كۇڭىمىزدەي قارايمىز.
شايتان سۋدى ءىشىپ الساق مىنا ءبىز،
اياق استى باتىر بولىپ شىعامىز.
كۇشتىلەرگە كۇشىمىزدى كورسەتپەي،
كۇشتەرى جوق ايەلدەردى ۇرامىز.
ءقايتسىن ەندى بايعۇس ايەل شىدايدى،
تاياق جەگەن قاي ادامعا ۇنايدى؟
ۇلكەن كۇنا جان جارىڭا قول جۇمساۋ،
ۇمىتپايىق كورىپ تۇرعان قۇدايدى!
سابايتىنداي سونشالىقتى نەسى بار،
كەيبىر ەركەك ءوز قاتەسىن كەش ۇعار.
ايەلىڭە جۇمسار كەزدە جۇدىرىق،
ءوز اناڭدى، ءوز اپكەڭدى ەسىڭە ال.
بەلىمىزدى بۋاتىن دا سول - ايەل،
كيىمىڭدى جۋاتىن دا سول - ايەل.
كەش كەلسەكتە اسىمىزدى جىلىتىپ،
بالامىزدى تۋاتىن دا سول - ايەل.
قاباعىڭنان ۇعاتىن دا سول - ايەل،
كۇتىپ الدان شىعاتىن دا سول - ايەل.
ساعات تۇنگى ون ەكىدەن اسقان سوڭ،
حابارلاسىپ تۇراتىن دا سول - ايەل.
ءسۇيىپ قانا كورسەت وعان شاماڭدى،
تەك ماحاببات كوركەيتەدى ادامدى.
ايەل - انا، ءوز اناڭداي قاراساڭ،
ول دا سەنىڭ قۇرمەتتەيدى اناڭدى.
جازعان جىرىم سايكەس كەلمەس بارشاعا،
وتباسى بار جۇرت قارايتىن تامسانا.
باعاسى جوق ەركەك تە بار ومىردە،
ساناسى جوق ايەلدەر دە قانشاما.
ءبىز ەركەكپىز ار-نامىستى ءبىر بەتكەي،
جۇرەيىكشى سول اتاۋدى كىرلەتپەي.
ايەلدەردى ايالايىق ءارقاشان،
جانارلارىن جاسقا مالىپ مۇڭدى ەتپەي.
جىلاماسىن جۇرەكتەگى مۇڭ كەتسىن،
كورسەتە ءبىل ءسۇيىپ الساڭ قۇرمەت شىن.
ارالارىڭ بەرىك بولىپ باستىسى،
وتباسىڭدى وزگە جاندار ۇلگى ەتسىن.
ەردىڭ ءىسى - ءوز ايەلىن قاراتۋ،
تامىرىنا سەزىم ءنارىن تاراتۋ.
سەن ەركەكسىڭ، وزىپ تۇرعان ونسىزدا،
ايەلىڭنەن وزام دەسەڭ بالا تۋ.
تىڭدا مەنى، ءاعا-ىنى، باۋىرىم،
اللا ارتقان بىزگە جۇكتىڭ اۋىرىن.
جۇگىمىزدى كوتەرىسىپ جۇرەتىن،
رەنجىتپەيىك ايەلدەردىڭ قاۋىمىن.
وعان دەگەن جۇرەگىڭدى جىلى ۇستا،
كوزبەن ۇقتىر ەشقاشاندا ۇرىسپا.
ايەل دەگەن قابىرعاڭنان جارالعان،
قابىرعانى تۇزەيمىن دەپ تىرىسپا.
سەن ەركەكسىڭ ءور كەۋدەلى، ەڭسەلى،
سول ەڭسەڭدى تۇسىرمەستەن تىك ۇستا!!
دۇرىس پا؟؟؟
ءاي-اي ايەلدەرگە...
تەكتى قايدام، تەكسىز تۋسا تەكتىدەن،
ەپتى قايدام، ەپسىز تۋسا ەپتىدەن.
كۇيەۋىنەن قورىقپايتىن ايەلدى،
قۇدايدان دا قورىقپايدى دەپ بىلەم.
كورىپ ءجۇرمىز ايەلدەردىڭ ءتۇر ءتۇرىن،
بالاسىنان ارتىق كۇتەر كىرپىگىن.
ال، ايەلدەر، ايتىڭدارشى ەركەكسىز
ەرتەگىدەي وتەدى مە بۇل كۇنىڭ؟
سەنبەڭىزدەر قيال تولى ەرتەككە،
ەرتەككە ەمەس سەنۋ كەرەك ەركەككە.
ەركەكتەرسىز وتكەن ءومىر - وكىنىش،
وكىنىشتەن بارماق تىستەپ، جەر تەپپە.
ەركەك دەگەن - بوستاندىقتى قالايدى،
كوز بولعان سوڭ قاراكوزگە قارايدى.
قاراي بەرسىن قاراسا دا ءبارىبىر،
سەنى عانا پەرىشتەگە بالايدى.
وعان بولا تۇسپەسىنشى ەڭسەڭىز،
ەڭ باستىسى ونى ءسۇيىپ، سەنسەڭىز.
الدامايدى، قارامايدى باسقاعا،
جۇرەگىنە ءسال تىنىشتىق بەرسەڭىز.
"قىدىرسىن" دەپ ۇيدە جالعىز قالدىڭ با،
بەرىلمەشى قىزعانىشقا، ءار مۇڭعا.
حابارلاسىپ الا بەرمە مازاسىن،
ۇيات بولار دوستارىنىڭ الدىندا.
حات جازىپ قوي وعان سول دا جەتەدى،
ەركەك دەگەن - اركەز ەلەڭ ەتەدى.
كەيدە ءتۇزۋ، كەيدە قيسىق كەتەدى،
ءوز توسەگى ورالاتىن مەكەنى!
ايەلدەر-اي، كوز ىزدەيتىن سوقىردان،
سوقىردىڭ دا كوزى ايەلدەن شوقىلعان.
اتالارىم اتتانعاندا سوعىسقا،
اجەلەرىم ۇيدە كۇتىپ وتىرعان.
ەڭ باستىسى ادال - سەنىم، اسقاق - ار،
ەكەۋىنسىز ويدى شايتان باسقارار.
كۇيەۋلەرىڭ دوستارىنا اتتانسا،
كەرىسىنشە ۇيدە سوعىس باستالار.
اقىلمەنەن شەشىڭىزدەر - اقىلىم،
ءومىر قىسقا ولشەپ بەرگەن شاقىرىم.
كەيدە شارشاپ جۇمىسىنان كەش كەلسە،
اسىن بەرىپ جاتقىزا سال اقىرىن.
ەركەك دەگەن - ءوز بالاڭداي تۇڭعىشىڭ،
ەركەك دەگەن - باقىت قۇسىڭ، جىل-قۇسىڭ.
ەركەك تۇزدە جۇرگەننەن سوڭ قاشاندا،
جان جاعىنان جاسالادى مىڭ قىسىم.
ءتۇسىن ونى... سىرى-قايعى، مۇڭى-شەر،
ول سياقتى تاعدىر ۋىن كىم ىشەر؟
ەركەك دەگەن - ايفون سوتكا سياقتى،
سيپاپ قالساڭ ءوز ىسىنە كىرىسەر.
ەركەك عانا - بۇيرىق بەرەر پاتشاڭىز،
ەركەك عانا - جەمىس توگەر باقشاڭىز.
مۇرىنىمدى كەسىپ سىزگە بەرەيىن،
سول ەركەكتەن ارتىق بىرەۋ تاپساڭىز.
ەركەك دەگەن - ەركەلەتەر كۇيەۋىڭ،
ەركەك دەگەن - سۇيەنەردە سۇيەۋىڭ.
دارى-دارمەك ۋىتىنا كەتپەيتىن،
ەركەك دەگەن - جۇرەكتەگى سۇيەلىڭ.
بۇيىرعانمەن قىدىرىستىڭ مىڭ ءساتى،
سىزگە زاكون سول كىسىنىڭ رۇقساتى.
ءبىر ساتىعا تومەن بولساڭ باعىنىپ،
كۇيەۋىڭدى كوتەرگەنىڭ ءبىر ساتى!
ايتاتىنىن قاباعىنان ۇعىڭدار،
ارتىق كەتسە ءبارىن ىشكە تىنىڭدار.
جىلى ءسوزدى اندا-ساندا ەستيتىن،
ەركەكتەردى ەركەلەتىپ تۇرىڭدار!!
اۆتورى: سايات ابەنوۆ
