جايلاعان جەرىم – جالعان، كوگىم جالعان،
جالعاننان كەلمەي جاتىپ كوڭىل قالعان
جانمىن مەن
بىلە-بىلسە بۇل ادامدار،
شىنىندا ولەڭمەنەن ءومىر جازعان.
جاتسا دا ال-دارمەننىڭ ءبارى ءبىتىپ،
دامدىدەن كادە كۇتكەن سارى مىسىق
سەكىلدى،
26 جىل بولدى مىنە،
جوعالعان ەلدى ىزدەيمىن جانۇشىرىپ.
بۇگىننەن وتكەن شاقتىڭ باعى باسىم
بولعاسىن مىنا ەلگە نەعىلاسىڭ
ءبىر بۇلدىر بولاشاققا بەت بۇرعان سوڭ
امال جوق وتكەنىڭدى ساعىناسىڭ.
كورگەندە شەندىلەرىن شاراي توپتىڭ
كەپ تۇرار ءزاردى سولاي قاراي توككىم،
الىسىپ ادام-قۇداي اتاۋلىمەن
بىلمەيمىن، مىنا كۇنگە قالاي جەتتىم؟
جاس السام جانارىما ءبىراۋىق كەپ
ات قويدى بۇ جۇرت ماعان جىلاۋىق دەپ.
جىلاسام جىلايمىن مەن: «شەندى يتتەرگە
ادامشا قارسى قاراپ تۇرايىق»–دەپ
ىشىندە ءجۇرمىن دەسەم كىل مازاقتىڭ،
«قۇدايعا» ەمەس، كونتابان قۇلعا جاقتىم.
ءبىر جاپىراق جۇرەكتىڭ دىرىلىمەن
كەلەمىن زارىن ايتىپ بۇل قازاقتىڭ.
قازاقتى ءبولىپ الا، قۇلاسىنا
كىم ەكەن باسشى بولعان شىعاسىعا؟
انەكەي، حاس تۇلپاردى ءپىشىپ تاستاپ،
تۇعىردىڭ باقىت قوندى ۇماسىنا
قازاقي ەمىرەنبەسە ەرەن ۇنگە،
بۇل ەلگە پەرزەنت بولىپ كەرەگىم نە؟
ودان دا ادام-قۇداي باسىمدى الىپ،
دوكەيلەر توي وتكىزسىن ولەرىمدە.
مىرزان كەنجەباي، اقىن
پىكىر قالدىرۋ