كۇللى الەمدى عاجايىپ داۋىسىمەن، ورىنداۋشىلىق شەبەرلىگىمەن ءتانتى ەتكەن ديماش قۇدايبەرگەننىڭ ءار ەلدەگى جانكۇيەرلەرى استانادا باس قوسپاق.

ونىڭ نەگىزگى ۇيىمداستىرۋشىسى – قازاقستاندا رەسمي تۇردە تىركەلگەن تۇڭعىش فان-توپ – «Dimash@Dostar».

قانداي دا ءبىر فان-توپتاردىڭ باس قوسۋ شاراسى قازاقستاندا بۇرىن-سوڭدى وتكىزىلگەن جوق ەدى. جانە جانكۇيەرلەردىڭ زاڭدى تۇلعا رەتىندە تىركەلۋى دە قازاقستاندا تۇڭعىش رەت بولىپ وتىر.

اقش، گەرمانيا، جۇڭگو، رەسەي، ۋكراينا، جاپونيا، قىرعىزستان ەلدەرىندەگى فان-توپ مۇشەلەرى ديماش قۇدايبەرگەنوۆتىڭ كونسەرتىنەن ءبىر كۇن بۇرىن وسى كەشكە قاتىسادى. اقش-تىڭ اريزونا شتاتىنان كەلگەن اقش-تاعى «ديماش فان-توبىنىڭ» جەتەكشىسى اليسا كەللوگ ءوز كولىگىنىڭ نومەرىن ارنايى سەرتيفيكاتپەن «DIMASH» دەپ الىپتى. ونىڭ كوشىرمەسىن انشىگە كەشە تابىس ەتتى. اليسا كەللوگ ەشقاشان شەت ەلگە شىعىپ كورمەگەن ەكەن. وعان سەبەپ – ۇشاقتان قاتتى قورقاتىندىعى. ءبىراق، وسى جولى ديماشتىڭ كونسەرتىن كورۋ ءۇشىن تاۋەكەلگە بەل بۋىپ، مۇحيتتىڭ ارعى جاعىنان 14 ساعات ۇشىپ كەلىپتى.  

ديماشتىڭ جانە قازاقتىڭ ءان ونەرىنە دەگەن قۇرمەتتەرىنىڭ بەلگىسى رەتىندە 26-ماۋسىم كۇنى باس قوسقالى وتىرعان فان-توپ وكىلدەرى – ءار ەلدەگى ءار ءتۇرلى جانە ءار جاستاعى ماماندىق يەلەرى. ولاردىڭ قاتارىندا دارىگەرلەر دە، ءتىل ماماندارى دا، زەينەتكەرلەر دە، ستۋدەنتتەر دە بار. ولار وسى كەشتە حالىقتار اراسىنداعى دوستىققا ونەردىڭ ىقپالىنىڭ ەرەكشە ەكەندىگىن پاش ەتپەك. وسىعان دەيىن تەك عالامتور ارقىلى حابارلاسىپ، سىرتتاي تانىس بولعان ولار سول كۇنى بىر-بىرىمەن جۇزبە-جۇز كورىسىپ، پىكىر الىسادى. كەلەر كۇندەرگە جوسپار قۇرادى.