بۇگىن اقوردادا مەملەكەتتىك حاتشى گۇلشارا ءابدىقالىقوۆا ۇزدىك جۋرناليستەرگە پرەزيدەنت سىيلىعى مەن گراناتتارىن تابىستادى. سالتاناتتىن جيىندا «حابار» ارناسىنىڭ ءتىلشىسى مايرا ءابدىراحمانوۆا پرەزيدەنت سىيلىعىنان الاتىن قارجىسىن قايىرىمدىلىق قورىنا اۋداراتىندىعىن ايتتى، دەپ حابارلايدى قامشى اقپاراتتىق اگەنتتىگى Baq.kz تىلشىسىنە سىلتەمە جاساپ.

«مەن ءۇشىن پرەزيدەنت سىيلىعىن الۋ ۇلكەن باقىت. بىرىنشىدەن مەملەكەت باسشىسى نۇرسۇلتان ءابىش ۇلى نازاربايەۆقا، ءارى «حابار» اگەنتتىگى مەن «24 KZ» ۇجىمىنا، ق ر پرەزيدەنتىنىڭ باسپا ءسوز قىزمەتىنە جانە كانديداتتاردى ىرىكتەپ العان بەدەلدى كوميسسيا مۇشەلەرىنە العىسىمدى بىلدىرەمىن. بۇل – ۇجىمنىڭ جەتىستىگى. مەن تەليەۆيدەنيەنىڭ تابالدىرىعىن وسىدان 30 جىل بۇرىن اتتادىم»، - دەدى ول.

وسى رەتتە تاجىريبەلى جۋرناليست العان سىيلىعىن «مەيىرىمدىلىك» قايىرىمدىلىق قورىنا اۋداراتىندىعىن جەتكىزدى.

«وزدەرىڭىز بىلەتىندەي، بۇل قوردى ارىپتەسىم، جۋرناليست ارۋجان ساين باسقارادى. ەلباسى ءوزىنىڭ «جىبەك جولى» بەيبىتشىلىك سىيلىعىنان العان قارجىسىن وسى قورعا اۋدارعان بولاتىن. ناتيجەسىندە 29 بالا ءولىم اۋزىنان قۇتقارىلدى. ولارعا شۇعىل تۇردە وپەراسيا جاسالدى. مەنىڭ ويىمشا، بالالارعا ءالى دە كومەك كەرەك. سوندىقتان ءبىز مەملەكەت باسشىسى نۇرسۇلتان نازاربايەۆتان ۇلگى الۋىمىز كەرەك»، - دەپ تۇيىندەدى ءسوزىن مايرا ءابدىراحمانوۆا.