اقمولا وبلىسىنىڭ اتباسار قالاسىندا بۇرىنعى قالپىنا كەلتىرۋگە بولمايتىن جانە سۋ كوپ كەلگەن ۇيلەردىڭ تۇرعىندارىنا 11 ءۇيدىڭ قۇرىلىسى باستالدى، دەپ حابارلايدى قامشى اقپاراتتىق اگەنتتىگى اتباسار اۋدانىنىڭ باسپا ءسوز قىزمەتىنە سىلتەمە جاساپ.  

26 ماۋىسىم كۇنى 1- مولتەك اۋدانىنىڭ اۋماعىندا جاڭا كوپقاباتتى كەشەندەردىڭ العاشقى قۇرىلىس جۇمىستارى باستاۋ الدى. باسپا ءسوز - قىزمەتىنىڭ مالىمەتىنشە ءبىرىنشى كۇننەن-اق تەحنيكا مەن كونتەينەرلەر اكەلىندى. ەكسكاۆاتور ءبىرىنشى قازانشۇڭقىر قازدى. سول جەردە گەودەزيستەر جۇمىس جۇرگىزىپ جاتىر.

ەسكە سالا كەتسەك، سۋ تاسقىنى كەزىندە  650 استام وبەكت زارداپ شەكتى. سونىڭ ىشىندە 644 تۇرعىن ۇيلەر، اتباسار ق. №1 ورتا مەكتەبى، «ەسىل» قالا سىرتىنداعى ساۋىقتىرۋ كەشەنى، كولىكتىك كوممۋنيكاسيالار.

تەكسەرىلگەن وبەكتىلەردىڭ 467 ءۇي ساراپشىلارمەن اپاتتىق دەپ سانالدى، ونىڭ ىشىندەگى 36 قيراپ قالدى. 168 ءۇي جوندەۋ جۇمىستارىنا جاتادى.

اقمولا ءوبلىسىنىڭ اكىمى مالىك مىرزالين  كوكشەتاۋ قالاسىندا وتكەن باسپا ءسوز – كونفەرەنسياسى بارىسىندا وبلىستىق بيۋدجەتتەن اتباسار اۋدانىنا تاسقىن سالدارىن جويۋ ءۇشىن 513 ميلليون تەڭگە ءبولىندى دەپ حابارلادى. بۇدان باسقا، ارنايى اشىلعان قايىرىمدىلىق ەسەپ شوتتان 30 ميلليون 500 مىڭ تەڭگە اۋدارىلدى.  

شولۋشى: اسەم المۇحانبەت