قازاقستاندا وتاندىق تەلەارنالاردىڭ سانى كوبەيىپ كەلەدى. وسىدان 20 جىل بۇرىن 2،3 ارنانىن مىسە تۇتتىق. سودان بەرى قازاقستاندىق تەلەجۋرناليستيكا كوپتەگەن جەتىستىكتەرگە جەتتى. ونىڭ ءبىر دالەلى رەتىندە ءتۇرلى اۋديتورياعا نەگىزدەلگەن تەلەارنالاردىڭ اشىلۋىن ايتسا بولادى. ماسەلەن، بالالارعا ارنالعان «بالاپان» تەلەارناسى. قازاقتىڭ كوپتەگەن قارا كوز قىزدارى مەن ۇلدارى اتالمىش تەلەارنانىڭ قازاق باتىرلارى جايىندا مۋلتفيلمدەر مەن تانىمدىق باعدارلامالارىن كورىپ كەلەدى. «بالاپان» تەلەارناسى تەك قازاق تىلىندە بولعاندىقتان بۇلدىرشىندەرىمىزدىڭ تازا قازاق تىلىندە سويلەۋىنە سەبەپ بولعانى دا جاسىرىن ەمەس.

تەلەجۋرناليستيكا سالاسىندا جەتكەن ەڭ ۇلكەن جەتىستىك رەتىندە تەك قازاق تىلىندە حابار تاراتاتىن «قازاقستان» ۇلتتىق تەلەارناسىن اتاپ وتپەۋگە بولماس.

بۇدان بولەك ءداستۇرلى يسلام ءدىنىن دارىپتەيتىن «اسىل ارنا»، وتاندىق انشىلەردىڭ اندەرىن روتاسيالايتىن «گاككۋ» ارناسى، ەلدىڭ جانە الەمنىڭ سپورت جاڭالىقتارىمەن پاتشا كوڭىلدى كورەرمەندى تانىستىرىپ جۇرگەن «Kaz.sport» تەلەارناسى بار.

جۋىردا قازاقستان رەسپۋبليكاسى اقپارات جانە كوممۋنيكاسيالار ءمينيسترى فيلمدەر تۋرالى حابار تاراتاتىن «ەلارنا» تەلەارناسىنىڭ ىسكە قوسىلاتىنىن ايتقان.

مۇنىڭ بارلىعى جەتىستىك ەمەس پە؟ الايدا ونىڭ كەمشىن تۇستارى دا جوق ەمەس. ياعني، وزگە ەلدىڭ باعدارلامالالارىنا پلاگيات جاساۋ. ءتىپتى ستۋدياسىنا دەيىن اينا قاتەسىز كوشىرىپ الاتىنىمىز جاسىرىن ەمەس. وسى تۇستا ءوز يدەيامىزدىڭ جوقتىعى ما دەگەن سۇراق تۋىندايدى. ءتىپتى ونەر بايقاۋلارىنىڭ ءوزى كوشىرمە. ارينە اۆتورلىق باعدارلامالار مۇلدە جوق دەۋدەن اۋلاقپىن. الەۋمەتتىك ماسەلەلەردى كوتەرەتىن، ايەلدەردىڭ باسىنداعى قيىندىقتاردى قوزعايتىن، شوۋ-بيزنەس سەركەلەرىن ناسيحاتتايتىن باعدارلامالار، توك-شوۋلار بار. دەسەك تە، قازاقستان جانە الەم ەكونوميكاسىنان حابار بەرەتىن، ساياسي، ساراپتامالىق، ۇلتتىق قۇندىلىقتاردى، ۇلتتىق ءداستۇردى، ۇلتتىق ونەردى دارىپتەيتىن باعدارلامالار جوقتىڭ قاسى. ونىڭ ورنىن ءۇندىستان مەن تۇركيانىڭ ماعىناسىز، ۇزىن-سونار تەلەحيكايالارى باسقان.

ب ا ق – حالىقتىڭ ءتىلى، كوزى، قۇلاعى. ونىڭ ىشىندە تەلەارنانىڭ ورنى ايرىقشا. سەبەبى حالىق اقپاراتتى تىڭداپ، كوزبەن كورەدى. حالىق راديونى كوبىنە كولىكتە ۋاقىتتا وتكىزۋ ءۇشىن تىڭداسا، قازاق ءتىلدى گازەتتەردىڭ تيراجى ورىس ءتىلدى گازەتتەرمەن سالىستىرعاندا از. ال تەلەارناداعى ونىمدەردىڭ كورەرمەندەرى قالىڭ، رەيتينگىسى جوعارى. وسىدان حالىقتىڭ ب ا ق ىشىندە تەلەارنانى كوبىرەك قارايتىنىن اڭعارۋ قيىن ەمەس.

وسى رەتتە كورەرمەنگە تاريح، ەكونوميكا، ساياسات، الەۋمەت، ءبىلىم ت.ب تانىمدىق اقپارات بەرەتىن، حالىقتىڭ پايدالى ىلىممەن سۋسىنداتاتىن جوبالار بولسا قۇبا-قۇپ. تەلەارانانىڭ قوزعاۋشى كۇش ەكەنىن پايدالانىپ ونى پايدالى، ساۋاپتى ىسكە پايدالانساق نۇر ۇستىنە نۇر بولارى انىق.

ارايلىم مەلدەشوۆا