ەۋروپاداعى قاۋىپسىزدىك جانە ىنتىماقتاستىق ۇيىمىنىڭ پارلامەنتتىك اسسامبلەياسى (ەقىۇ پا) كييەۆ ۇسىنعان «ۋكراينانىڭ ەگەمەندىگى مەن تەرريتوريالىق تۇتاستىعىن قالپىنا كەلتىرۋ» تۋرالى قارار قابىلداعان. بۇل تۋرالى Qamshy.kz ازاتتىق راديوسى اقپاراتىنا سۇيەنىپ حابارلايدى.  رەسەي بۇل قاراردى قابىلداۋعا قارسى بولعان.

ەقىۇ پا قارارىندا "ۋكراينانىڭ ەگەمەندىگىن، تاۋەلسىزدىگىن، بىرلىگىن جانە ونىڭ قىرىم اۆتونوميالىق رەسپۋبليكاسى مەن سيەۆوستوپول قالاسى قوسا كىرەتىن، حالىقارالىق قاۋىمداستىق تانىعان شەكارا كولەمىندەگى تەرريتورياسىنىڭ تۇتاستىعىن تولىق قۇرمەتتەيتىنى" تۋرالى مالىمدەگەن.

سونىمەن بىرگە قۇجاتتا "رەسەي فەدەراسياسىنىڭ قىرىم اۆتونوميالىق رەسپۋبليكاسى مەن سيەۆوستوپول قالاسىن ۋاقىتشا وككۋپاسيالاۋىن جانە رەسەيدىڭ دونباستا ۋكرايناعا قارسى جالعاستىرىپ جاتقان گيبريدتىك اگرەسسياسىن ايىپتايتىنى" ايتىلعان.

بۇعان قوسا ەقىۇ پا "رەسەي فەدەراسياسىن رەسەي-ۋكراين مەملەكەتتىك شەكاراسىنىڭ ۇكىمەتتىڭ باقىلاۋىنان تىس بولىگى ارقىلى ادامدار، اقشا، قارۋ-جاراق جونەلتۋ ارقىلى ۋكرايناداعى تەررورلىق قىزمەتكە دەمەۋشىلىك جاساۋدى دوعارۋعا جانە ۋكراينا جەرىندە تەراكتىلەر جاساپ وتىرعان ۋكراينانىڭ دونەسك مەن لۋگانسك وبلىستارىنىڭ جەكەلەگەن اۋداندارىنداعى زاڭسىز قارۋلى قۇرىلىمدارعا كەز-كەلگەن قولداۋدى تىيۋعا تاباندىلىقپەن شاقىراتىنى" تۋرالى مالىمدەگەن.

سونداي-اق قۇجاتتا ەقىۇ پا رەسەيدى "ۋكراينانىڭ دونەسك جانە لۋگانسك وبلىستارىنىڭ جەكەلەگەن اۋداندارىنداعى قارۋلى قۇرىلىمدارىن، اسكەري تەحنيكاسى مەن جالدامالى ساربازدارىن شىعارۋدى قامتاماسىز ەتۋگە" شاقىراتىنى جازىلعان.

رەسەي 2014 جىلى كوكتەمدە ۋكراينا قۇرامىنداعى قىرىم تۇبەگىن اۋەلى اسكەرىن جىبەرىپ، كەيىن 16 ناۋرىزدا "رەفەرەندۋم" وتكىزۋ ارقىلى وزىنە قوسىپ العان. بۇۇ باس اسسامبلەياسى رەسەيدىڭ قىرىمدى اننەكسيالاۋىن كوپشىلىك داۋىسپەن زاڭسىز دەپ تانىعان. ۋكراينا شىعىسىندا 2014 جىلدىڭ كوكتەمىنەن بەرى جالعاسىپ جاتقان ۇكىمەت كۇشتەرى مەن رەسەيشىل سەپاراتيستەر اراسىنداعى قارۋلى قاقتىعىس سالدارىنان ءۇش مىڭنان استام بەيبىت تۇرعىن قازا تاپقان.

باتىس ەلدەرى ماسكەۋدىڭ قىرىمدى اننەكسيالاۋىنا جانە شىعىس ۋكرايناداعى جانجالدا سەپاراتيستەرگە قولداۋ بىلدىرگەنىنە بايلانىستى رەسەيگە قارسى سانكسيالار سالعان.