ءۇندىستاننىڭ سولتۇستىك-شىعىسىنداعى اسسام شتاتىندا دا شەلەكتەپ قۇيعان جاڭبىردىڭ سوڭى سۋ تاسقىنىنا ۇلاسىپ، 27 ادام قازا تاپتى. بۇل تۋرالى قامشى اقپاراتتىق اگەنتتىگى شەتەلدىك باق-قا سىلتەمە جاساپ حابارلايدى.

تاعى 10 تۇرعىن ءىز-تۇزسىز جوعالىپ كەتكەن. تابيعي اپاتپەن كۇرەس جونىندەگى باسقارمانىڭ حابارلاۋىنشا، ايماقتىڭ جارتىسىنان استامى سۋ استىندا قالىپ، 500 مىڭداي ادام زارداپ شەگىپ وتىر. جەرگىلىكتى بيلىك 180-نەن استام ۋاقىتشا ورتالىق اشىپ، 20 مىڭ ادامدى كوشىرگەن. مىڭعا جۋىق ەلدى مەكەندى سۋ باسىپ، 41 مىڭ گەكتار ەگىستىك القابى بۇلىنگەن. قۇزىرلى ورگان وكىلدەرى تابيعي اپات قۇرباندارىنىڭ سانى ارتا ءتۇسۋى مۇمكىن دەيدى. پرەمەر-مينيستر نارەندرا مودي جاپا شەككەندەرگە كومەك بەرۋ ءۇشىن بارلىق شارالاردى قولعا الۋدى تاپسىردى.

ايتا كەتەيىك، وتكەن ايدىڭ ورتاسىندا دا اسسام شتاتىندا سۋ تاسقىنى بولىپ، 14 تۇرعىن كوز جۇمعان ەدى.

شولۋشى: ايگەرىم تاۋباي