جامبولات سارسەنوۆ دۇنيەجۇزىلىك مۇناي كەڭەسىنىڭ ماركەتينگ جونىندەگى ۆيسە-پرەزيدەنتى جانە اتقارۋشى كوميتەتىنىڭ مۇشەسى بولىپ سايلاندى، دەپ جازادى قامشى اقپارات اگەنتتىگى. بۇل تۋرالى KAZENERGY قاۋىمداستىعىنىڭ باسپا ءسوز قىزمەتى حابارلادى.
اتالمىش شەشىم ىستامبۇل قالاسىندا ءوتىپ جاتقان 22ء-شى دۇنيەجۇزىلىك مۇناي كونگرەسى اياسىندا قابىلدانعان.
جامبولات سارسەنوۆ جاڭا قىزمەتىندە بارلىق قاتىسۋشىلار اراسىنداعى قارىم-قاتىناستى وڭتايلاندىرۋ، ۇلتتىق جانە حالىقارالىق مۇناي كومپانيالارىن ءارى قاراي ءتيىمدى دامىتۋ ماقساتىندا كەڭەستىڭ وڭ بەدەلىن كۇشەيتۋ ءارى ىلگەرىلەتۋ سياقتى ماڭىزدى باعىتتار بويىنشا دۇنيەجۇزىلىك مۇناي كەڭەسىنە مۇشە ەلدەردىڭ جۇمىستارىن ۇيلەستىرەدى. سونىمەن قاتار ول باتىس پەن شىعىس مەملەكەتتەردىڭ، اسىرەسە اعىلشىن تىلىندە سويلەمەيتىن ەلدەردىڭ مۇنايعا بايلانىستى مۇددەلەرى مەن تاجىريبەلەرىن بىرىكتىرۋگە قاتىستى ماسەلەلەرگە جەتەكشىلىك ەتەدى. دمك اياسىندا تالانتتى ماماندار مەن تاجىريبەلى كاسىپقوي مامانداردىڭ داعدىلارى مەن قۇزىرەتىن بىرىكتىرۋ جانە ۇيلەستىرۋ دە سارسەنوۆتىڭ باسقارۋىندا بولماق.
KAZENERGY قاۋىمداستىعىنىڭ باسپا ءسوز قىزمەتى ءمالىم ەتكەندەي، قازاقستاننىڭ ەنەرگەتيكالىق سالاسىنىڭ اعىمداعى جانە پەرسپەكتيۆتى دامۋىنىڭ جاي-كۇيى تۋرالى كەشەندى تۇسىنىك قالىپتاستىرۋ ماقساتىندا قاۋىمداستىق ۇلتتىق ەنەرگەتيكالىق بايانداما ازىرلەدى، وندا قازاقستان رەسپۋبليكاسىنىڭ مۇناي-گاز جانە ەنەرگەتيكا سالاسىنىڭ ءبىرتۇتاس جۇيە رەتىندە تۇراقتى دامۋىنا كAZENERGY قاۋىمداستىعىنىڭ ستراتەگيالىق كوزقاراسى بەينەلەنگەن. قازاقستان دمك-گە كەڭەس شەڭبەرىندەگى نارىقتىڭ دامۋى جانە بولجامدارى تۋرالى وسىعان ۇقساس ەسەپتەر دايىنداپ بەرۋگە ۇسىنىس جاساعالى وتىر.
وسىلايشا جامبولات سارسەنوۆتىڭ دمك-دەگى جوعارى لاۋازىمدى قىزمەتكە تاعايىندالۋى قازاقستان اتىنان KAZENERGY قاۋىمداستىعىنىڭ دۇنيەجۇزىلىك مۇناي نارىعىندا وڭ بەدەلى مەن ۇستانىمىن نىعايتۋدا جاسالعان كەزەكتى ءبىر قادامى بولىپ تابىلادى جانە تاجىريبە الماسۋعا مۇمكىندىك بەرەدى، سونىمەن قاتار كەڭەس مۇشەلەرىنىڭ بارلىق ەلدەرى اراسىنداعى ىنتىماقتاستىققا جاڭا سەرپىن بەرەدى.
شولۋشى: گۇلىم جاقان
