«يراك پەن ليەۆانت لاڭكەستىك توبىنىڭ» سودىرلارىنا قارسى كۇرەستە ءىرى جەتىستىككە قول جەتتى. بۇل تۋرالى قامشى اقپاراتتىق اگەنتتىگى شەتەلدىك باق-قا سىلتەمە جاساپ حابارلايدى.

يراكتا اتىشۋلى ۇيىمنىڭ بەيرەسمي استاناسى سانالاتىن موسۋل تولىعىمەن جاۋدان تازارتىلىپ، ۇكىمەت جاساعىنىڭ باقىلاۋىنا ءوتتى. جەرگىلىكتى حالىقتىڭ قۋانىشىندا شەك جوق. ۇزاق ۋاقىت بويى ۇرەيدە ءومىر سۇرگەن موسۋل جۇرتى تۋعان قالاسىنىڭ ازات ەتىلگەنىنە سەنەر-سەنبەسىن بىلمەيدى. ەلدەگى ەكىنشى ءىرى شاھار 3 جىل بويى «يراك پەن ليەۆانت لاڭكەستىك توبىنىڭ» ۋىسىندا بولعان.

 ونىڭ جاۋدان ارىلعانى جايلى حاباردى تەك موسۋل حالقى عانا ەمەس، وزگە دە اۋماق تۇرعىندارى زور قۋانىشپەن قابىلدادى.

اسكەريلەردى جەڭىسىمەن قۇتتىقتاۋ ءۇشىن قالاعا پرەمەر-مينيستردىڭ ءوزى كەلدى. نەگىزى موسۋلدى ازات ەتۋ شاراسى شامامەن 9 اي بويى جۇرگىزىلگەن. وعان ۇكىمەت جاساعى مەن كۇرد جاۋىنگەرلەرى قاتىسقان. ساربازدارعا اقش باستاعان حالىقارالىق كواليسيا اۋەدەن سوققى بەرىپ، قولداۋ كورسەتتى. 9 اي ىشىندە 1300 ەكسترەميستىڭ كوزى جويىلعان. بەيبىت حالىق اراسىندا دا ادام شىعىنى از ەمەس. 4 مىڭنان استام تۇرعىننىڭ وپات بولعان. ال قاقتىعىس كەزىندە قازا تاپقان جاۋىنگەرلەردىڭ سانى 30 مىڭعا جۋىقتايدى.

ءقازىر جاۋىنگەرلەر مينالاردى زالالاسىزداندىرۋمەن اينالىسىپ جاتىر. قاسكويلەر شاھاردان سىتىلىپ شىقپاس بۇرىن ولاردى كوپتەپ قويىپ تاستاعان. نەگىزى، 3 جىل بويى ەلدى مەكەندى ۋىسىندا ۇستاعان سودىرلار ويىنا كەلگەنىن ىستەپ باقتى. اتىس-شابىستان جەرگىلىكتى اۋەجاي، ۆوكزال، ۋنيۆەرسيتەت، اۋرۋحانا، مەكتەپتەر مەن جولدار ءبۇلىندى. جەرگىلىكتى بيلىك مۇنىڭ ءبارىن قالپىنا كەلتىرۋ وڭايعا سوقپايدى دەيدى. الدىن الا مالىمەت بويىنشا، بۇل جۇمىستارعا كەمى 5 جىل جانە ميللياردتاعان دوللار كەتۋى مۇمكىن.

اتىشۋلى ۇيىمنىڭ يراكتاعى باس تىرەگى ازات ەتىلدى. ەندى كورشى سيريادا وسى توپتىڭ بەيرەسمي استاناسى راككا ءۇشىن شايقاس جالعاسىپ جاتىر. ساراپشىلار وندا دا لاڭكەستەردىڭ جەڭىلەتىنىنە كۇمان كەلتىرمەيدى. الايدا سونىڭ وزىندە دە جاۋدىڭ تىزە بۇگۋى ەكىتالاي دەيدى. سودىرلارىڭ جارتىسى تاۋعا قاشىپ، سوندا جاسىرىنۋى مۇمكىن دەگەن كۇدىك بار. سونداي-اق جەردەگى حاليفاتىنان ايىرىلعان ەكسترەميستەر الەۋمەتتىك جەلىلەر ارقىلى ىقپال ەتۋىن كۇشەيتە مە دەگەن كۇدىك سەيىلمەي تۇر. وسى رەتتە حالىقارالىق قاۋىمداستىق عالامتورداعى باقىلاۋدى كۇشەيتۋگە شاقىرىپ وتىر. 

شولۋشى: ايگەرىم تاۋباي