بۇل شارا جۇكتىلىكتىڭ ەرتە كەزەڭىندە ايەلدەردى ۋاقىتىندا ءارى ساپالى تەكسەرىستەن وتكىزۋ ءۇشىن ەنگىزىلگەن، دەپ حابارلايدى قامشى اقپاراتتىق اگەنتتىگى ەلوردا اكىمدىگىنىڭ مەديا ورتالىعىنا سىلتەمە جاساي وتىرىپ.

- ساپالى ءارى ۋاقىتىلى مەديسينالىق كومەك كورسەتۋ ءۇشىن بىزدە ەمحانالاردا "جاسىل دالىزدەر" ۇيىمداستىرىلدى.جۇكتى ايەلدەر ءۇشىن ارنايى تىركەۋ بار.

ولار مىندەتتى تۇردە اكۋشەر-گينەكولوگ دارىگەرگە، تەراپيەۆتكە جانە وزگە دە ماماندارعا جىبەرىلەدى. ياعني اۋىرىپ جۇرگەن باسقا ەمدەلۋشىلەرمەن بىرگە ورتاق كەزەكتە تۇرمايدى، - دەپ حابارلادى مەديا ورتالىق تىلشىسىنە ەلوردالىق دەنساۋلىق ساقتاۋ باسقارماسىنىڭ باس شتاتتان تىس اكۋشەر-گينەكولوگى حاليدا شاريپوۆا.

ونىڭ سوزىنشە، پروفيلاكتيكالىق تەكسەرىس جۇكتى ايەلدەردە ەكستراگەنيتالدى پاتولوگيانى دەر كەزىندە انىقتاۋعا مۇمكىندىك بەرەدى.

- ايەلدەر ساۋ بالانى دۇنيەگە اكەلۋ ءۇشىن، اياعى اۋىر كەزدە كەرى اسەر بولماۋ ءۇشىن ۋاقىتىندا اۋماقتىق ەمحانالارعا بارىپ تۇرۋ كەرەك، الدىن الا دايىندىق جۇرگىزۋ قاجەت. وكىنىشكە قاراي، دارىگەرگە جۇكتى بولعان كەزدە عانا كەلەدى، - دەيدى دارىگەر.

قالالىق دەنساۋلىق ساقتاۋ باسقارماسىنىڭ مالىمەتىنشە، 2017 جىل باسىنان بەرى استانادا 6 مىڭنان استام بالا دۇنيەگە كەلگەن. ورتا ەسەپپەن تاۋلىگىنە ەلوردادا بۇگىنگى ۋاقىتتا جۇمىس ىستەپ تۇرعان ءۇش پەريناتالدى ورتالىقتا  60-65 بالا ومىرگە كەلەدى.

سالىستىرار بولساق، 2016 جىلى استانادا 27 244 بالا تۋىلعان. بۇل 2015 جىلمەن سالىستىرعاندا 8%-عا ارتقان جانە رەكوردتى كورسەتكىش. 

شولۋشى: اقنۇر مۇحتارحان