قازاقستاندا اۋىز سۋ ءتاريفى تاعى دا ءوسۋى كۇتىلۋدە. ساراپشىلار باعانىڭ بىردەن 32-40 پايىزعا دەيىن قىمباتتاۋى مۇمكىن ەكەنىن ايتىپ وتىر. بۇل تۋرالى "قازاقستان سۋ ارناسى" قاۋىمداستىعىنىڭ ەكونوميست-ساراپشىسى مانشۇك سارسەنبەكوۆا "كازپراۆدا" باسىلىمىنا بەرگەن سۇحباتىندا مالىمدەدى دەپ حابارلايدى قامشى اقپاراتتىق اگەنتتىگى sn.kz-كە سىلتەمە جاساي وتىرىپ.
ونىڭ ايتۋىنشا، باعانىڭ ءوسۋى 2015 جىلدىڭ ءساۋىر ايىندا بەكىتىلگەن تاريفتەر ساياساتىمەن بايلانىستى ەكەن.
"تاريفتەر قۇرىلىمىندا ينۆەستيسيالىق سالىمدار پايدا بولدى، بۇل ءوز كەزەگىندە قۇبىرلاردى جاڭارتۋعا، سۋمەن جابدىقتاۋ جۇيەلەرىن جاڭعىرتۋعا ينۆەستيسيالار اكەلۋى ءتيىس. ءبىراق بۇل تاريفتىك ساياساتقا كوشۋ ءۇشىن سۋ ارنالارىنىڭ ءوز قاراجاتتارى جەتپەيدى، سوندىقتان باعانى وسىرۋگە ءماجبۇر"، - دەيدى سارسەنبەكوۆا.
قازاقستاننىڭ 8 قالاسىنداعى سۋ جۇيەلەرىن قايتا جاڭارتۋ جۇمىستارىنا ينۆەستيسيا قۇيۋدى ءبىرىنشى بولىپ ەۋروپانىڭ قايتا قۇرۋ جانە دامۋ بانكى قولداعان.
"كەلەسى جىلى تاعى بىرنەشە كەلىسىمشارتقا قول قويىلادى دەپ كۇتىلۋدە. بۇل باعىتتا ءقازىر جۇمىستار اتقارىلىپ جاتىر. جالپى ينۆەستيسيا كولەمى 124 ملرد تەڭگە. ەۋروپانىڭ قايتا قۇرۋ جانە دامۋ بانكى 2015-2020 جىلدار ارالىعىندا 18،4 ملرد تەڭگە ينۆەستيسيا قۇيادى"، - دەيدى سارسەنبەكوۆا.
شولۋشى: اقنۇر مۇحتارحان
