استانادا قورشاعان ورتانى قورعاۋ جانە كليمات وزگەرۋى بويىنشا ەو-ورتالىق ازيا جۇمىس توبىنىڭ كەزدەسۋى ءوتتى دەپ حابارلايدى قامشى اقپاراتتىق اگەنتتىگى. بۇل جۇمىس توبى قورشاعان ورتانى قورعاۋ جانە سۋ رەسۋرستارى سالاسىندا ەو-ورتالىق ازيا ىنتىماقتاستىق پلاتفورماسى شەڭبەرىندە جۇمىس ىستەيدى. اتالمىش پلاتفورما 2007 جىلى قابىلدانعان ەۋروپالىق وداقتىڭ ورتالىق ازيامەن جاڭا ارىپتەستىك ستراتەگياسىنىڭ ءبىر ەلەمەنتى بولىپ تابىلادى. قاتىسۋشىلار قورشاعان ورتا سالاسىنداعى ايماقتىق ىنتىماقتاستىقتى نىعايتۋ، سۋ رەسۋرستارىن باسقارۋ، ينفراقۇرىلىم جانە كليماتتىڭ وزگەرۋى سالاسىنداعى جوبالاردى حالىقارالىق قارجىلاندىرۋ ماسەلەلەرىن، سونىمەن قاتار، ورتالىق ازيا ەلدەرىنىڭ الەۋەتىن ارتتىرۋ/كادرلاردى دايىنداۋداعى باستى قاجەتتىلىكتەرىن تالقىلادى.
وتىرىسقا ەۋروپالىق كوميسسيا، ەو مۇشە-ەلدەرىنىڭ وكىلدەرى، قازاقستان، قىرعىزستان، تاجىكستان، تۇرىكمەنستان جانە وزبەكستان ءتيىستى مينيسترلىكتەرىنىڭ وكىلدەرى، حالىقارالىق قارجى ينستيتۋتتارى، ورتالىق ازيانىڭ ايماقتىق ۇيىمدارى، حالىقارالىق ۇيىمدار، سونىمەن قاتار، ۇەۇ جانە ازاماتتىق قوعام ينستيتۋتتارىنىڭ وكىلدەرى قاتىستى.
«بۇگىنگى كۇنى ءبىز جۇمىس توبىنىڭ بەس وتىرىستارىن وتكىزدىك، ونىڭ ىشىندە، تاشكەنتتە، ميلاندا جانە بريۋسسەلدە. تاجىريبەدە قولدانىسى جاعىنان استاناداعى وسى 6-شى وتىرىس وتە ماڭىزدى. بۇگىن ءبىز ينفراقۇرىلىم جانە كليماتتىڭ وزگەرۋى سالاسىنداعى جوبالاردى قارجىلاندىرۋ ءۇشىن حالىقارالىق قورلارعا قولجەتكىزۋدىڭ باستى ماسەلەلەرىن تالقىلادىق. قورشاعان ورتا جانە ينفراقۇرىلىم سالاسىنداعى جوبالاردى قارجىلاندىرۋ، ونىڭ ىشىندە ينۆەستيسيالاردى تارتۋعا اسەر ەتەتىن اسپەكتىلەرگە قاتىستى ساياسات ماسەلەلەرى قاراستىرىلدى. وسى ماقساتپەن ەو قارجىلاندىراتىن «WECOOP2»* جوباسىمەن ورتالىق ازياداعى بارلىق مۇددەلى تاراپتار ءۇشىن ينۆەستورلار تۋرالى باسشىلىق ازىرلەنۋدە. وندا حالىقارالىق قارجى ينستيتۋتتارى قولداناتىن تارتىپتەر مەن ىرىكتەۋ كريتەرييلەرى بويىنشا كەڭەستەر ۇسىنىلاتىن بولادى. سونىمەن قاتار، ءبىز تابيعاتتى قورعاۋ قىزمەتىن باسقارۋدى جاقسارتۋ جانە جوبالار ازىرلەۋ ماقساتىندا ورتالىق ازيا ەلدەرى مەن ايماقتىق ۇيىمداردىڭ الەۋەتىن ارتتىرۋ قاجەتتىلىكتەرىن قاناعاتتاندىرۋ جولدارىن قاراستىرىپ جاتىرمىز. بولاشاقتا ورتالىق ازيا ەلدەرىمەن ىنتىماقتاسۋ ءۇشىن باسقا دا يدەيالاردى دامىتۋدامىز. ءبىز ورتالىق ازيا ەلدەرىنەن جوبالاردى دايىنداۋ، قارجىلاندىرۋ جانە مەملەكەتتىك-جەكە ارىپتەستىك بويىنشا ايماقتىق جەتىك تاجىريبە/كونسۋلتاسيالىق قىزمەتتەر ورتالىعىن قۇرۋ تۋرالى پىكىرلەرىن كۇتەمىز»، - دەپ قازاقستانداعى ەۋروپالىق وداق وكىلدىگىنىڭ باسشىسى، ەلشى ترايان حريستەا كەزدەسۋ جونىندە ويىمەن ءبولىستى.
ورتالىق ازيا ەلدەرى سۋ جانە ەنەرگەتيكالىق رەسۋرستارى جاعىنان، سونىمەن قاتار، تابيعاتتى قورعاۋ قىزمەتىن باسقارۋ سالاسىنداعى ساياساتتارى جاعىنان ءوزارا تاۋەلدى. ورتالىق ازيا ءۇشىن ەڭ كۇردەلى ماسەلەلەر سۋ رەسۋرستارىنىڭ سارقىلۋى، ءوسىپ كەلە جاتقان سۋعا دەگەن سۇرانىستان ۋشىعا تۇسەتىن سۋدى پايدالانۋدىڭ تومەن تيىمدىلىگى، ەكوجۇيەلەردىڭ ناشارلاۋى بولىپ تابىلادى. كليماتتىڭ وزگەرۋى، يندۋستريالاندىرۋ، قالالاردىڭ ءوسۋى جانە ورمانسىزدانۋ ايماقتىڭ سۋ رەسۋرستارىنا قىسىمنىڭ بۇرىنعىدان ارتۋىنا ىقپال ەتەدى. تابيعات رەسۋرستارىن ۇقىپسىز باسقارۋ جەرلەردىڭ ناشارلاۋىنا، توپىراق ەروزياسىنا جانە بيوالۋانتۇرلىلىكتىڭ جويىلۋىنا اكەلەدى.
«WECOOP2» جوباسى تۋرالى
ايماقتىق ىنتىماقتاستىق جانە ەو-ورتالىق ازيانى قولداۋدىڭ ەكىنشى كەزەڭىندە ەۋروپالىق وداق (ەو) 2016 جىلدىڭ تامىزىندا قورشاعان ورتا، كليمات وزگەرۋى جانە سۋ رەسۋرستارى سالاسىنداعى ايماقتىق ىنتىماقتاستىق بويىنشا جوبانى (WECOOP2) باستادى. ول ورتالىق ازيا ارىپتەس-مەملەكەتتەرى اراسىنداعى ديالوگتى نىعايتۋدى جانە تۇراقتى دامۋدى جالعاستىرۋعا جانە ولاردىڭ ەو-پەن قورشاعان ورتا جانە كليماتتىڭ وزگەرۋى ماسەلەلەرى بويىنشا ىنتىماقتاسۋىنا جاردەمدەسۋگە باعىتتالعان. جوبانىڭ كەڭسەسى استانادا، قازاقستان، ورنالاسقان جانە ۇلتتىق ساراپشى-كوورديناتورلار ارىپتەس-مەملەكەتتەردە بىر-بىرىمەن كەلىسىمدىلىكتە جۇمىس ىستەيدى. جوبانى ەۋروپالىق وداق قارجىلاندىرادى، جانە «Stantec» قۇرامىنا كىرەتىن «MWH» كومپانياسى باسقاراتىن كونسورسيۋم جۇزەگە اسىرادى. كونسورسيۋم ارىپتەستەرى بولىپ قورشاعان ورتانى قورعاۋ جونىندەگى اۆستريالىق اگەنتتىك جانە «اەو كاۆكاز» ايماقتىق ەكولوگيالىق ورتالىعى بولىپ تابىلادى.
