اتىراۋ وبلىسىندا اشىق تەڭىزدە ءۇش تاۋلىك بويى قالىپ قويعان بالىقشى قۇتقارىلدى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساي وتىرىپ.

«قۇلسارى قالاسىنىڭ 1964 جىلعى تۇرعىنى 6 شىلدە كۇنى اسپالى موتورلى قايىقپەن كاسپيي تەڭىزىنە اتتانادى. 7ء-سى كۇنى ول ۇيىنە ورالمايدى. 8 شىلدەدە ونىڭ تۋىستارى تج دەپارتامەنتىنە جوعالعانى تۋرالى ءوتىنىش تۇسىرەدى. ولار ءوتىنىشتى كەشكە تۇسىرگەندىكتەن، تىكۇشاقتى اۋەگە جىبەرۋ مۇمكىن بولمادى. جاعالاۋدى اۋەدەن باقىلاۋ 9 شىلدە كۇنى تاڭعى ساعات 5.50-دە باستالدى»، - دەپ حابارلادى اتىراۋ وبلىستىق تج دەپارتامەنتى.

كەيىن جوعالعان ادامى بار قايىق قامىستاردىڭ اراسىنان تابىلدى. ارنايى جابدىقتاردىڭ كومەگىمەن ول اۋە كەمەسىنىڭ بورتىنا كوتەرىلىپ، قۇرعاق جەرگە جەتكىزىلدى. بالىقشى اۋرۋحاناعا جاتۋدان باس تارتتى.

شولۋشى: اسەل بولات قىزى