استانادا ق ر پرەمەر-مينيسترى باقىتجان ساعىنتايەۆتىڭ قاتىسۋىمەن ەۋرازيالىق ۇكىمەتارالىق كەڭەستىڭ «كەڭەيتىلگەن» قۇرامداعى وتىرىسى ءوتتى، ونىڭ قورىتىندىسى بويىنشا ءبىرقاتار كوپجاقتى قۇجاتتارعا قول قويىلدى دەپ حابارلايدى Qamshy.kz اقپارات اگەنتتىگى.

وتىرىستا قازاقستان رەسپۋبليكاسىنىڭ پرەمەر-مينيسترى ب.ساعىنتايەۆ، قىرعىز رەسپۋبليكاسىنىڭ پرەمەر-مينيسترى س.جەەنبەكوۆ، ارمەنيا رەسپۋبليكاسىنىڭ پرەمەر-مينيسترى ك.كاراپەتيان، بەلارۋس رەسپۋبليكاسىنىڭ پرەمەر-مينيسترى ا.كوبياكوۆ، رەسەي فەدەراسياسى ۇكىمەتىنىڭ ءتوراعاسى د.مەدۆەديەۆ، ەۋرازيالىق ەكونوميكالىق كوميسسيا القاسىنىڭ ءتوراعاسى ت.ساركيسيان ءسوز سويلەدى.

ءوز سوزىندە باقىتجان ساعىنتايەۆ ەۋرازەق اياسىندا، سونداي-اق ءۇشىنشى ەلدەرمەن ساۋداداعى تاۋار اينالىمى ءوسىمىنىڭ وڭ قارقىن بەرگەنىن اتاپ ءوتتى. جۇمىستىڭ بەلگىلەنگەن قارقىنى ەۋرازيالىق ەكونوميكالىق وداقتىڭ جۇمىس جاساۋىمەن بايلانىستى اسا وزەكتى ماسەلەلەردى قاراۋعا جانە ولارعا جەدەل ارەكەت ەتۋگە مۇمكىندىك بەرەدى.

سونىمەن قاتار، ودان ءارى دامىتۋ ءۇشىن ەۋرازەق ىشكى نارىعىندا كەدەرگىسىز ورتا قۇرۋ بويىنشا جۇمىستار جالعاسادى. ەۇاك-گە مۇشە ەلدەر 60-تان استام كەدەرگىلەردى جويۋ بويىنشا جول كارتالارىن ازىرلەۋ جۇمىستارىن جۇرگىزۋدە.

بۇدان وزگە، قازاقستاندىق تاراپ كوتەرگەن ماسەلەلەردىڭ ىشىندە ورتاق قارجى نارىعىن قالىپتاستىرۋ تۇجىرىمداماسىنىڭ جوباسىن تالقىلاۋ، كەمە قاتىناسى تۋرالى، ءۇشىنشى ەلدەرمەن ءوزارا ساۋداداعى تەحنيكالىق كەدەرگىلەردى جويۋ ءتارتىبى مەن شارتتارى تۋرالى كەلىسىمشارتتاردى قابىلداۋ، سونداي-اق ەڭبەك رەسۋرستارىنىڭ ورتاق نارىعىن قۇرۋ ماسەلەلەرى بولدى.

وعان قوسا، ونەركاسىپ سالالارىن ودان ءارى دامىتۋ، اگروونەركاسىپ كەشەنى جانە عىلىمي ازىرلەمەلەردى كوممەرسيالاۋ سالالارىن ودان ءارى دامىتۋ ماسەلەلەرى قارالدى. سونداي-اق، ەكسپورتتاۋشىنىڭ ەۋرازەق-قا مۇشە مەملەكەتتەردىڭ قايسىسىنا جاتاتىنىنا قاراماستان، تەڭىز پورتتارىنا شىعۋعا تەڭ قۇقىقتى قامتاماسىز ەتۋ قاجەتتىگى تۋرالى ۇسىنىس جاسالدى.

ەۇاك وتىرىسىندا ءبىرقاتار كوپجاقتى قۇجاتتارعا، ولاردىڭ ىشىندە كەلەسىلەرگە قول قويىلدى:

ۇكىمەتارالىق كەڭەستىڭ وكىمدەرى: «2016 جىلى ەۋرازەق-قا مۇشە مەملەكەتتەردىڭ بيۋدجەتتەرىنىڭ اراسىندا كەدەندىك اكەلىم باجدارىنىڭ سوماسىن ەسەپتەۋ جانە ءبولۋ تۋرالى»، «ەۋرازەق ورتاق ەلەكتر ەنەرگەتيكالىق نارىعى اياسىندا ورتالىقتاندىرىلعان ساۋدانى ۇيىمداستىرۋ ءۇشىن ساۋدا الاڭدارىن پايدالانۋدىڭ جانە ەۋرازەق ورتاق ەلەكتر ەنەرگەتيكالىق نارىعىن قالىپتاستىرۋ بويىنشا ءىس-شارالاردى قارجىلاندىرۋدىڭ كەيبىر ماسەلەلەرى تۋرالى»، «ەۋرازيالىق ۇكىمەتارالىق كەڭەستىڭ كەزەكتى وتىرىسىن وتكىزۋ ۋاقىتى جانە ورنى تۋرالى».

ۇكىمەتارالىق كەڭەستىڭ تاپسىرمالارى: «ەۋرازيالىق ەكونوميكالىق وداقتىڭ سيفرلىق كۇن ءتارتىبىن ىسكە اسىرۋدىڭ نەگىزگى باعىتتارىن دايىنداۋ بويىنشا جۇمىس بارىسى تۋرالى»، «ەۋرازيالىق ەكونوميكالىق وداققا مۇشە مەملەكەتتەردىڭ ەڭبەكشىلەرىن زەينەتاقىمەن قامتاماسىز ەتۋ تۋرالى كەلىسىمشارت جوباسى بويىنشا جۇمىس بارىسى تۋرالى»، جوعارعى ەۋرازيالىق ەكونوميكالىق وداقتىڭ «قازاقستان رەسپۋبليكاسىنىڭ دۇنيەجۇزىلىك ساۋدا ۇيىمىنا قوسىلۋىنا بايلانىستى كەيبىر ماسەلەلەر تۋرالى» 2015 ج. 16 قازانداعى №22 شەشىمىنىڭ 4-تارماعىنا سايكەس قالىپتاستىرىلعان تاۋەكەل بەيىمدەرى قولدانىلاتىن تاۋارلاردى كەدەندىك دەكلاراسيالاۋ پراكتيكاسىنا جۇرگىزىلگەن مونيتورينگ تۋرالى ەسەپتەردى ۇسىنۋ تۋرالى» جانە «2017 جىلعى 11 ساۋىردەگى ەۋرازيالىق ەكونوميكالىق وداقتىڭ كەدەن كودەكسى تۋرالى كەلىسىمشارتىنىڭ كۇشىنە ەنۋىنە قاجەتتى مەملەكەتشىلىك راسىمدەردى وتكىزۋ تۋرالى».