ورتالىق كوممۋنيكاسيالار قىزمەتىنىڭ الاڭىندا ماڭعىستاۋ وبلىسى اكىمىنىڭ ورىنباسارى ماقسات سقاقوۆتىڭ قاتىسۋىمەن باسپا ءسوز كونفەرەنسيا ءوتتى دەپ حابارلايدى Qamshy.kz اقپارات اگەنتتىگى ماڭعىستاۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.

ەكسپو-2017 حالىقارالىق مامانداندىرىلعان كورمەسى اياسىندا ماڭعىستاۋ وبلىسىنىڭ «قارت كاسپييدەن سالەم ال، ەركە ەسىل!» اتتى ونەر كۇندەرى وتەدى. 15-18 تامىز ارالىعىندا بارلىعى 38 مادەني شارا وتەدى دەپ جوسپارلانىپ وتىر.

مادەنيەت كۇندەرىنىڭ اشىلۋى 15 تامىز كۇنى ساعات 21.30-دا ەكسپو الاڭىنداعى امفيتەاتردا وتەدى. اشىلۋعا ماڭعىستاۋ وبلىسىنىڭ اكىمى ەرالى توعجانوۆ جانە 350 ونەرپاز قاتىسادى. كونسەرتتىك باعدارلامادا ق ر ەڭبەك سىڭىرگەن قايراتكەرى، دارىن سىيلىعىنىڭ لاۋرەاتى ا.قوسانوۆا، تامارا اسار، كامشات جولدىبايەۆا، عالىمجان جولداسباي، لۇقپان جولداسوۆ ونەر كورسەتەدى.

16 تامىزدا «شابىت» شىعارماشىلىق سارايى جامبىل جابايەۆ اتىنداعى كونسەرت زالىندا ساعات 19.00-دا ق ر مەملەكەتتىك سىيلىعىنىڭ لاۋرەاتى ەسەنعالي راۋشانوۆتىڭ «ءبىزدىڭ ەلدىڭ جىلقىسى كىل كوكمويناق» اتتى شىعارماشىلىق كەشى وتەدى. كەشكە 53 ونەرپاز قاتىسپاق. 

17 تامىز كۇنى ساعات 16.00-دە ەتنو-اۋىلدا ەتنوگرافيالىق تەاترلاندىرىلعان مادەني شارانىڭ اشىلۋى وتەدى. ۇلتتىق ءسالت-داستۇر، ۇلتتىق سپورتتىق ويىندار، ات جارىسى جانە ت.ب. بارلىعى 273 ونەرپاز قاتىسادى.  

ساعات 19.30-21.00-دە دارىن سىيلىعىنىڭ لاۋرەاتى تامارا اسار، عالىمجان جولداسباي  جانە «جورعا» حالىقتىق بي ءانسامبلىنىڭ فولكلورلىق كونسەرتى وتەدى . كەشكە 65 ونەرپاز قاتىسادى.

سول كۇنى ساعات 19.00-دە كونگرەسس-حوللدا ماڭعىستاۋ وبلىستىق م.وسكىنبايەۆ اتىنداعى فيلارمونياسى ا.تاراق ۇلى اتىنداعى ۇلت-اسپاپتار وركەسترىنىڭ ءداستۇرلى ان-كۇي-جىر سازدارىنىڭ كونسەرتى بولادى. وعان 70 ءارتىس قاتىسادى.

18 تامىز كۇنى ساعات 19.00-دە  م.گوركيي اتىنداعى مەملەكەتتىك اكادەميالىق ورىس دراما تەاترىندا ن.ءجانتورين اتىنداعى وبلىستىق مۋزىكالىق-دراما تەاترىنىڭ «شىڭىراۋ» سپەكتاكلى وتەدى. بارلىعى 45 ءارتىس قاتىسادى دەپ جوسپارلانۋدا.

سونىمەن قاتار 15-18 تامىز كۇندەرى ەتنو-اۋىل ايماعىندا دا ءتۇرلى مادەني شارالار وتەدى.

جالپى، استاناداعى ماڭعىستاۋدىڭ مادەنيەت كۇندەرىنە بارلىعى 567 ونەرپاز قاتىسادى. ونىڭ 20-سى قولونەر شەبەرلەرى، 233 كاسىبي ۇجىمدار مەن ارتىستەر جانە 120 ەتنومادەني بىرلەستىكتەرىنىڭ كوركەم ونەرپازدارى.