جاڭا وقۋ جىلىندا تۇركيا رەسپۋبليكاسى قازاقستاندىق ستۋدەنتتەرگە 500 وقۋ گرانتىن بولەدى دەپ حابارلايدى Qamshy.kz اقپارات اگەنتتىگى بعم باسپا ءسوز قىزمەتىنە سىلتەمە جاساپ. بۇل گرانتتار ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىندە تەگىن ءبىلىم الۋعا مۇمكىندىك بەرەدى. تۇركيا گرانتىن جەڭىپ العان تالاپكەرلەر 1 جىل بويى دايىندىق، ءتىل ۇيرەتۋ ورتالىعىندا Foundation باعدارلاماسى بويىنشا تەگىن وقىتىلادى. باعدارلامانى مەڭگەرىپ، قورىتىندى ەمتيحاندى ءساتتى تاپسىرعان ءبىلىم الۋشىلار 1-كۋرسقا تۇركيا رەسپۋبليكاسىنىڭ گرانتى نەگىزىندە قابىلدانادى. كونكۋرس مينيسترلىكتىڭ جۇيەسىمەن بەيىندىك پانىنە سايكەس تاڭداعان ماماندىق بويىنشا جۇرگىزىلەدى.

ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتى قازاقستاندا دا، شەتەلدە دە باسەكەگە قابىلەتتى بولۋ ماقساتىندا حالىقارالىق دەڭگەيدەگى ءبىلىم بەرۋ باعدارلامالارىن جاساۋدا. ۋنيۆەرسيتەتتىڭ بولاشاق جوسپارلارىندا باكالاۆر جانە ماگيسترلىك باعدارلامالاردىڭ سانىن، ءبىلىم بەرۋ پروسەسىن، ماتەريالدىق-تەحنيكالىق، الەۋمەتتىك ينفراقۇرىلىمداردى دامىتۋ  كوزدەلگەن. ول وتاندىق جانە شەتەل ستۋدەنتتەرى ءۇشىن ۋنيۆەرسيتەتتىڭ باسەكەگە قابىلەتتىلىگىن  ارتتىرۋعا كومەكتەسەدى.

ۋنيۆەرسيتەت الەمدىك دەڭگەيدەگى ءبىلىم بەرۋ مەكەمەسى عانا ەمەس، سونىمەن قاتار، اكادەميالىق ۇتقىرلىق باعدارلاماسى بويىنشا دا ءبىلىم تاراتاتىن، تاجىريبە الماساتىن ورتالىق بولىپ تابىلادى. جىل سايىن 400-گە جۋىق ستۋدەنتتەر تۇركيانىڭ جانە ەۋروپا ەلدەرىنىڭ الدىڭعى قاتارلى ۋنيۆەرسيتەتتەرىندە 1 سەمەستر جوعارى ءبىلىمدى دامىتۋ مۇمكىندىگىنە يە بولادى.

ۋنيۆەرسيتەتتىڭ ءبىلىم بەرۋ جۇيەسى مەن باعدارلامالارى بولون ۇدەرىسىنە جانە الەمنىڭ الدىڭعى قاتارلى ۋنيۆەرسيتەتتەرىنىڭ وقىتۋ جۇيەلەرىنە نەگىزدەلگەن. كورپۋستارى ەۋروپالىق ۇلگىدە سالىنعان. بۇگىنگى تاڭدا ستۋدەنتتەر الەمنىڭ 17 مەملەكەتىنەن كەلىپ وقيدى. ال، تۇلەكتەر – قازاقستانداعى ەڭ ءىرى مەدياحولدينگتەردىڭ، كاسىپورىندار مەن مەكەمەلەردىڭ باسشىسى بولىپ قىزمەت اتقارۋدا.

قازىرگى تاڭدا ۋنيۆەرسيتەت ۇجىمى حالىقارالىق اككرەديتتەۋدەن وتكەن ءبىلىم بەرۋ باعدارلامالارىنىڭ نەگىزىندە باسەكەگە قابىلەتتى جوعارى بىلىكتى ماماندار دايارلايتىن الەمدىك دەڭگەيدەگى ۋنيۆەرسيتەتكە اينالۋ بويىنشا جۇمىس جاساپ جاتىر.

تۇركيا گرانتىنىڭ كونكۋرسىنا وتىنىشتەردى قابىلداۋ 10 تامىزدان باستالىپ، 25 تامىزعا دەيىن جالعاسادى.