ءبىلىم جانە عىلىم ءمينيسترى ەرلان ساعادييەۆ قازاقستاندا ءبىلىم گرانتتارى قالاي ۇلەستىرىلگەنى جايلى ايتتى، – دەپ حابارلايدى Qamshy.kz  اقپارات اگەنتتىگى tengrinews.kz-كە سىلتەمە جاساي وتىرىپ.

«جوو-لارعا قابىلداۋ ەرەجەلەرى جايلى، حالىقتى الاڭداتقان سۇراقتارعا توقتالىپ وتكىم كەلەدى. بيىل تالقىلاپ، شەشۋىمىز قاجەت. ءبىرىنشىسى – ماماندىقتار بويىنشا گرانتتاردى ۇلەستىرۋ. سەبەبى ءبىز ەكونوميكانىڭ الەۋەتتى سالالارى بويىنشا گرانتتاردى ۇلەستىرەمىز. مىسالى، ەسەپتەۋ تەحنيكاسىنا 610، ال قۇقىقتانۋعا بار بولعانى 45، جالپى مەديسيناعا 2500 جانە ستوماتولوگياعا 45. بۇل ءتۇرلى باعدارلامالاردا بەكىتىلگەن. جىل سايىن جوعارى بالل العاندار گرانتسىز قالىپ جاتىر، ال از بالل العاندار باسقا ماماندىقتارعا گرانت الىپ جاتىر»، – دەدى ساعادييەۆ ۇكىمەت وتىرىسىندا.

ونىڭ پىكىرىنشە، گرانتتاردى ۇلەستىرۋدىڭ ەكونوميكالىق تۇرعىداعى ويعا قونىمدىلىعى الەۋمەتتىك ادىلدىك ماسەلەسىنە كەلىپ تىرەلەدى. 

«جىل سايىن بۇل اتا-انالاردىڭ تاراپىنان كوپتەگەن سۇراق تۋىنداتىپ جاتىر. بۇل – جاڭالىق ەمەس، جىل سايىن پروسەسكە جاڭا ۇرپاق پەن تاجىريبەسى جوق اتا-انالار مەن بالالار كەلىپ جاتقانىن دا ەسكەرۋ قاجەت. ولار ءبىرىنشى رەت مۇندايدان ءوتىپ وتىر. ونىڭ ۇستىنە الەۋەتتى ماماندىقتار بويىنشا گرانتتار ءتىزىمى وتە كەش شىعادى، بىزدە مينيسترلىكتەر مەن اكىمدىكتەرمەن كوپ دۇنيەنى كەلىسۋ قاجەتتىگىن جيناۋ جۇيەسى اۋىر. تالاپكەر ءوز مۇمكىندىگىن باعامداي المايدى، وعان پروفيلدىك ءپان تاڭداۋعا جانە دايىندالۋعا ۇلگەرمەي جاتادى»، – دەدى ق ر بعم باسشىسى.

ول مينيسترلىكتىڭ وسى ماسەلە بويىنشا بىرنەشە شەشىمدى ۇسىناتىنىن ايتىپ ءوتتى. مىسالى، بەلگىلى ءبىر ماماندىقتارعا قانشا گرانت بولىنەتىنىن الدىن الا ءۇش جىلعا شىعارىپ قويۋ، ياعني، ءۇش جىلدىق بيۋدجەت اياسىندا مۇمكىن مالىمەتتەردى جاريالاۋ. ونىڭ ايتۋىنشا، بۇل ماسەلەنى بيىل تالقىلاپ، شەشىمگە كەلۋ كەرەك.

«ەكىنشىسى – جەڭىلدىكتەر. اۋىلدىق كۆوتا مەن جەتىم بالالارعا بەرىلەتىن كۆوتا ماسەلەسى تالقىلانىپ جاتىر، ءبىراق ماسەلە ءالى دە شەشىلمەدى. «التىن بەلگى» جايلى ايتاتىن بولساق. بيىل گرانتتار ۇبت-دان جيناعان باللدار بويىنشا بەرىلدى. كەيىنىرەك رەسپۋبليكالىق كوميسسيا «التىن بەلگى» يەگەرلەرى الدىندا مىندەتتەرىن ورىنداۋ ءۇشىن مەملەكەتتىك گرانتتارعا شامامەن تاعى 4 پايىز گرانت قوستى. بيىل ءبىز وسى جۇيەگە زاڭدى تۇردە وزگەرتۋلەر ەنگىزۋدى جوسپارلاپ وتىرمىز»، – دەدى ساعادييەۆ.

سونداي-اق، مينيستر جەتەكشى وقۋ ورىندارىندا، اسىرەسە، استاناداعى جوو-لاردا ورىن جەتىسپەۋشىلىگىن ايتىپ ءوتتى.

«بۇل جوو-لاردىڭ تانىمالدىعىمەن بايلانىستى، ياعني، بارلىعى ەلورداعا بارعىسى كەلەدى. سايكەسىنشە، جوعارى بالل جيناعان بالالار ەۋرازيا ۇلتتىق ۋنيۆەرسيتەتىنە نەمەسە استانانىڭ مەديسيانالىق اكادەمياسىنا، ءتىپتى، اقىلى بولىمىنە تۇسە المايدى. سەبەبى ورىن جوق. بيىل بۇل ماسەلە تاعى دا تالقىلانادى. ءبىزدىڭ ويىمىزشا، مۇنى تالقىعا سالىپ، ءبىر شەشىمىن تابۋ كەرەك»، – دەدى ەرلان ساعادييەۆ.