بۇل تۋرالى ماڭعىستاۋ وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى سەرىك ساعىنبايەۆ مالىمدەدى دەپ حابارلايدى Qamshy.kz اقپارات اگەنتتىگى ماڭعىستاۋ وبلىسى اكىمدىگىنىڭ باسپا ءسوز قىزمەتىنە سىلتەمە جاساپ.

ونىڭ ايتۋىنشا، ماڭعىستاۋ وبلىسىنىڭ اكىمى ەرالى توعجانوۆتىڭ تاپسىرماسىنا سايكەس، يۋنەسكو-نىڭ جاھاندىق گەوپاركى مارتەبەسىن الۋ ءۇشىن ماڭعىستاۋ وبلىسىنىڭ اۋماعىنداعى تابيعي جانە مادەني مۇرالاردى ۇسىنۋ جونىندە جۇمىس توبى قۇرىلىپ جانە ءىس-شارالار جوسپارى جاساقتالعان. 

ايتا كەتۋ كەرەك، ماڭعىستاۋدا قۇرىلاتىن گەوپارك تەك رەسپۋبليكا كولەمىندە عانا ەمەس، سونداي-اق تمد كولەمىندەگى العاشقى گەوپارك بولماق.

جىل سوڭىنا دەيىن ماڭعىستاۋ وبلىسىنىڭ ەرەكشە تابيعي نىساندارىن تولىق زەردەلەپ، گەوپارك قۇراتىن جەردى انىقتاۋ ماقساتىندا جانە يۋنەسكو-نىڭ جاھاندىق گەوپاركىنە ۇمىتكەرلەرگە قويىلاتىن تالاپتارعا سايكەس ءوتىنىم دايىندالاتىن بولادى.

"يۋنەسكو-نىڭ  جاھاندىق گەوپارك جۇيەسىنە الەمنىڭ 35 ەلىنەن 127 گەوپارك كىرەدى. الەمدىك تاجىريبەگە سۇيەنسەك، جاھاندىق گەوپارك جۇيەسىنە كىرگەن تەرريتورياعا تۋريستتىك جانە ەكونوميكالىق قىزىعۋشىلىقتىڭ ارتاتىنى انىق"، – دەيدى سەرىك ساعىنبايەۆ.