قازاقستاننىڭ تۋروپەراتورلارى «استانا ەكسپو-2017» ۇق اق باسقارما ءتوراعاسى احمەتجان ەسىموۆتەن حالىقارالىق كورمەنى 1 قاراشاعا دەيىن سوزۋدى سۇرادى دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

اشىق حات اۆتورلارىنىڭ ايتۋىنشا، تۋروپەراتورلار مەن تۋربىرلەستىكتەر ءۇشىن تۇڭعىش رەت تۋريزمنەن پايدا تابۋعا مۇمكىندىك تۋعان.

«از ۋاقىتتىڭ ىشىندە ءبىز كوپتەگەن جۇمىس ورىندارىن اشىپ، ۇلكەن تابىس تاپتىق. ستۋدەنتتەر مەن اتالعان سالانىڭ كوپتەگەن ماماندارى شارالاردى ۇيىمداستىرۋدا جانە شەت تىلدەرىن مەڭگەرۋدە باعا جەتپەس تاجىريبە الدى. جاستاردىڭ جۇمىسپەن قامتىلۋى ارتتى. كومپانيالار 10-نان 200 ادامعا دەيىن جاستاردى جۇمىسقا الدى. وتاندىق تۋروپەراتورلار وزدەرىنىڭ تۋرمارشرۋتتارىن ءىس جۇزىندە سىننان وتكىزىپ، تۋريستەردىڭ پىكىرلەرىن جيناقتادى جانە ءوز ونىمدەرىن جەتىلدىرۋگە كىرىستى. بۇگىنگى كۇنى وسى مۇمكىندىكتىڭ «ەكسپو-2017» كورمەسى بارىسىندا عانا، ياعني تەك ءۇش ايعا عانا بەرىلگەنى ماسەلە بولىپ تۇر. قۇرمەتتى احمەتجان سماعۇل ۇلى! تۋربىرلەستىكتەردىڭ اتىنان قازاقستان رەسپۋبليكاسىنىڭ پرەزيدەنتى مەن كورمەنىڭ حالىقارالىق بيۋروسىنا ءوتىنىش جولداپ، كورمەنى 2017 جىلدىڭ 1 قاراشاسىنا دەيىن سوزۋ مۇمكىندىگىن قاراستىرۋدى سۇرايمىز»، – دەلىنگەن ۇندەۋحاتتا.

وعان قول قويعانداردىڭ اراسىندا تۋروپەراتورلار، رەستوراتورلار، قوناق ءۇي بيزنەسىنىڭ وكىلدەرى بار. اشىق حاتقا جالپى 30 كومپانيا قول قويعان.