ەلباسى قازاق ۇلتتىق اگرارلىق ۋنيۆەرسيتەتىنىڭ رەكتورى تىلەكتەس ەسپولوۆتى قابىلدادى. بۇل تۋرالى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە بەرىپ حابارلايدى.
كەزدەسۋ بارىسىندا قازاق ۇلتتىق اگرارلىق ۋنيۆەرسيتەتىنىڭ رەكتورى جوعارى وقۋ ورنىنىڭ قىزمەتى مەن دامۋ پەرسپەكتيۆاسى جونىندە مالىمدەدى.
– ءبىز بۇگىندە ون ءبىر حالىقارالىق كونسورسيۋمعا مۇشەمىز. 2015 جىلدان باستاپ QS ەەسا («دامۋشى ەۋروپا جانە ورتالىق ازيا») تۇجىرىمى بويىنشا الەمنىڭ ۇزدىك ۋنيۆەرسيتەتتەرىنىڭ رەيتينگىنە قاتىسىپ، بۇل باعالاۋ اياسىندا العاشقى جىلى 150 جوعارى وقۋ ورنىنىڭ ىشىنەن 67-ورىنعا يە بولدىق. قازىرگى ۋاقىتتا ۋنيۆەرسيتەتتە 50-گە جۋىق عىلىمي جوبا ىسكە اسىرىلۋدا، – دەدى ت.ەسپولوۆ.
سونىمەن قاتار، مەملەكەت باسشىسىنا وتاندىق اگروونەركاسىپتىك كەشەندى يننوۆاسيالىق دامىتۋعا مۇمكىندىك بەرەتىن ۋنيۆەرسيتەتتىڭ اگروتەحنولوگيالىق حابىنىڭ قىزمەتى جونىندە ايتىلدى.
– بۇل حاب جاڭا تەحنولوگيالاردى، يدەيالار مەن ستارتاپ جوبالاردى ىزدەستىرۋگە، ولاردى تارتۋعا جانە ەنگىزۋگە، سونداي-اق مەملەكەت-جەكەمەنشىك سەرىكتەستىگىنىڭ تەتىكتەرىن ىسكە اسىرىپ، ۋنيۆەرسيتەتتىڭ ءوزىن-وزى قارجىلاندىرۋىن جانە دەربەستىگىن قامتاماسىز ەتۋگە ارنالعان، – دەدى قازاق ۇلتتىق اگرارلىق ۋنيۆەرسيتەتىنىڭ رەكتورى.
قازاقستان پرەزيدەنتى ەلىمىزدىڭ اۋماعىندا اۋىل شارۋاشىلىعى سالاسىنداعى عىلىمي ورتالىق قۇرۋ قاجەت ەكەنىن اتاپ ءوتتى.
– عىلىمي زەرتتەۋلەردىڭ ناتيجەلەرىن ەنگىزۋ مەن مامانداردى دايارلاۋدىڭ تيىمدىلىگىن ارتتىرعان ءجون. سونداي-اق، اگروونەركاسىپتىك كەشەننىڭ باسەكەگە قابىلەتتى، ەكسپورتقا باعىتتالعان ونىمدەرىنىڭ كولەمىن ارتتىرۋ كەرەك، – دەدى نۇرسۇلتان نازاربايەۆ.
