الەۋمەتتىك جەلىدە وعىز دوعان ەسىمدى تۇركيالىق ءجۋرناليستىڭ ەير-استانا ۇشاعىنداعى جولسەرىكتەن قازاق تىلىندە قىزمەت كورسەتۋدى سۇراعان، الايدا وعان جاۋاپ رەتىندە جولسەرىك زاڭ جازىلعان قاعازدى ۇسىنىپ، پوليسيا شاقىراتىنىن ايتقان ۆيدەو تارالعانى حابارلانعان.

بولعان وقيعاعا بايلانىستى وعىز دوعاننىڭ ءوز اۋزىنان ايتقان ۆيدەوسىن Aman Qazaq ەسىمدى فەيسبۋك قولدانۋشىسى جاريالادى دەپ حابارلايدى Qamshy.kz اقپارات اگەنتتىگى.

«استانا-الماتى باعىتىندا ەير-استانا ۇشاعىمەن ۇشقانىمدا قازاق قىزى كەلىپ، ورىس تىلىندە سايرادى. مەن مەملەكەتتىك تىلدە سويلەۋىن سۇراعانىمدا، مىنەزىن كورسەتتى. ءبىراق مەن تالاپ ەتتىم»، - دەيدى تۇركيالىق جۋرناليست.

وعىز دوعاننىڭ ايتۋىنشا، جولسەرىك ورىس جانە اعىلشىن تىلدەرىندە عانا قىزمەت كورسەتكەن. ال تۇركيالىق ازامات تالاپ ەتكەن مەملەكەتتىك تىلدە جولسەرىك قىز تۇسىندىرمەگەن. ونىڭ ۇستىنە قىزدىڭ ەر ادامدى كەلەكە ەتىپ  تۇرعانى بايقالادى.

«الگى ورىس قىز قۇجاتتارمەن كەلدى، ولارمەن مەنىڭ بەتىمدى جاۋىپ، تەلەفونىمدى يتەرىپ، ءوزى بىردەڭەلەردى ورىس تىلىندە ايتىپ تۇر. مەن قۇجاتتاردى دا تۇسىنبەدىم. قاعازدارىن لاقتىرىپ جىبەرگەنىمدە، «پوليسيا، پوليسيا» دەپ ايقايعا باستى. ۇشاقتان شىقساق، قازاقستاننىڭ پوليسياسى كۇتىپ تۇر ەكەن. «اكىمشىلىك ەرەجەلەردى بۇزدىڭىز» دەگەن ايىپپەن مەنى الىپ كەتتى. بەلگىسىز سەبەپتەرمەن پوليسيا بولىمشەسىندە ۇستاپ وتىردى»، - دەيدى وعىز دوعان.

پوليسيا قىزمەتكەرلەرى 6800 تەڭگە ايىپپۇل سالعان تۇركيالىق ازامات قازاقستان رەسپۋبليكاسىندا مەملەكەتتىك تىلدە، اتا-بابامىزدىڭ ۇرپاقتان-ۇرپاققا قالدىرعان انا تىلىندە سويلەۋىن تالاپ ەتكەنى ءۇشىن 1 تەڭگە ايىپپۇل سالۋدى دا ۇيات سانايدى. ونىڭ بار تالاپ ەتەتىنى، ۇشاقتاعى جولسەرىك قىزدى جاۋاپقا تارتىپ، جازالاۋ شاراسىن قولدانۋ.

«بۇل ءبىر ادامنىڭ عانا ەمەس، قازاق ەلىنىڭ پروبلەماسى. قازاق ەلىندە قازاق ءتىلىن قۇرمەتتەۋدى سۇراۋعا ءبارىمىزدىڭ قاقىمىز بار. مەن تەك سونى سۇرايمىن»، - دەپ قورىتىندىلادى ءسوزىن تۇرىك ازاماتى.